Më shumë se tre vite nga atentati mafioz në mes të qytetit të Shkodrës, ku u ekzekutuan në motiv të dukshëm hakmarrjeje dy vëllezërit Astrit dhe Brahim Bilali, njëkohësisht biznesmenë vendorë dhe një prej tyre babai i ish-kampionit të boksit, Astmer Bilali, drejtësia ka dhënë verdiktin e parë.
25 vite burgim është dënimi i formës së prerë nga Gjykata e Apelit për Arsen Stojkun, njërin nga personat e arrestuar dhe akuzuar për vrasjen e dy vëllezërve Bilali. Arsen Stojku akuzohet se ka pasur rol në vrasjen e babait dhe xhaxhait të Astmer Bilalit, duke u zënë pritë afër banesës.
Fillimisht gjykata e Shkodrës e kishte dënuar Stojkun me 6 vite heqje lirie, për akuzën e “përkrahjes së autorit të krimit”. Ndërsa Prokuroria në pretencën e saj kishte kërkuar dënimin e tij me 35 vite burgim, për akuzën e “vrasjes në rrethana cilësuese”, në dëm të dy personave. Arsen Stojku është personi i vetëm që ndodhet në burg për vrasjen e vëllezërve Astrit dhe Brahim Bilali, teksa ka pasur të paktën edhe tre të dyshuar të tjerë, përfshi edhe të shumëkërkuarin Ibrahim Lici, si kreu i grupit rival të Bajrave dhe njëkohësisht Bilalëve.
Por mungesa e provave deri tani dhe refuzimi për të bashkëpunuar i Stojkut kanë lënë në sirtar dosjen për këtë pjesë hetimi. Organi i akuzës këmbënguli në shkallën e dytë se sipas provave e gjurmëve, Stojku ka qenë prezent në vendin e krimit, si bashkëautor dhe Apeli e gjeti fajtor të riun, duke ia katërfishuar dënimin dhe rrëzuar verdiktin e shkallës së parë. Stojku dhe dy të tjera, që më pas u liruan, njiheshin si lidhje shoqërore apo farefisnore e Licëve dhe madje në rrjetet sociale u zbuluan fotografi të tyre, teksa pozonin të armatosur.
Arsen Stojku, 29 vjeç, u arrestua më 25 Prill të vitit 2019, në lidhje me vrasjen e dy vëllezërve Bilali në Shkodër, ngjarje kjo e ndodhur me 30 mars, pra një muaj para.
Dy të arrestuarit akuzohen për “vrasje me paramendim kryer në bashkëpunim” dhe “prodhimi dhe mbajtja pa leje e armëve luftarake dhe municionit”. Brahim dhe Astrit Bilali janë vrarë me 21 plumba, në rrugën që të çonte te banesat e tyre. Ata u përpoqën të vetëmbrohen, pasi mbanin armë për shkak të konflikteve të dukshme, por pa sukses. Autorët i kapën në befasi dhe i lanë të vdekur.
Vëllezërit Bilali zotëronin edhe një fermë-biznes me hipizëm, pasi edhe në të kaluarën kishin qenë kampionë të këtij sporti. Shkaku i vrasjes besohet se ka qenë miqësia që kishte lidhur Astmer Bilali me fisin Bajri, rivalë të Licëve.
Më herët ish-kampioni sipas hetimeve me të dhëna operative, kishte qenë mik i Licëve, por i ka tradhtuar dhe në shenjë hakmarrjeje nisi saga e përgjakshme në vitin 2017, në luftën e pamëshirshme mes dy grupeve rivale, që deri tani numëron të paktën 15 të vrarë, ku shumica e atentateve janë ende pa autorë.
