Gjykata e Apelit ka lënë në fuqi dënimin me 30 vite burg për Agron Tufën, i cili ishte dënuar nga Gjykata e Krujës për vrasjen makabre të Kejsi Hysës, ngjarje e ndodhur në vitin 2018.
Kufoma e Hysës u gjet e fshehur në afërsi të Niklës, dhe hetimet e mëvonshme zbuluan se ngjarja lidhej me pazare të kanabisit.
Tufa, i cili dyshohet se ishte pjesë e konfliktit për trafikun e lëndëve narkotike, e kreu krimin me motive të lidhura me këtë aktivitet të paligjshëm.
Edhe pse avokatët e të akuzuarit apeluan dënimin, Gjykata e Apelit nuk ka ndryshuar vendimin e Gjykatës së Krujës, duke e lënë të pandryshuar dënimin e 30 viteve burg.
NJOFTIM PËR MEDIA
GJYKATA E APELIT TË JURIDIKSIONIT TË PËRGJITHSHËM
Referuar raportimeve të mëparshme në media, Gjykata e Apelit të Juridiksionit të Përgjithshëm informon për zhvillimet e mëposhtme:
Në bazë të materialit të referuar nga Komisariati i Policisë Krujë, Prokuroria e Rrethit Gjyqësor Krujë regjistroi procedimin penal për ngjarjen e ndodhur më 07.07.2018, ku shtetasi me inicialet S.H. kallëzoi zhdukjen e djalit të tij, K.H. Pas marrjes në pyetje të shtetasit H.R., ky i fundit deklaroi se së bashku me shtetasin A.T. kishin vrarë dhe groposur K.H. pranë varrezave të lagjes.
Pas kërkesës së Prokurorisë, në Gjykatën e Rrethit Gjyqësor Krujë u zhvillua gjykimi i çështjes penale ndaj të pandehurit A.T., i akuzuar për veprat penale “Vrasje me dashje”, “Mbajtja pa leje dhe prodhimi i armëve”, dhe “Fshehja ose asgjësimi i kufomës”, të parashikuara nga nenet 76-25, 278/1-25 dhe 303-25 të Kodit Penal.
Me vendimin nr. 99, datë 17.06.2021, Gjykata e Rrethit Gjyqësor Krujë vendosi:
Dënimin e A.T. me 20 (njëzet) vite burgim për “Vrasje me dashje” kryer në bashkëpunim.
Dënimin me 5 (pesë) vite burgim për “Mbajtjen pa leje dhe prodhimin e armëve”.
Dënimin me 5 (pesë) vite burgim për “Fshehjen ose asgjësimin e kufomës”.
Bashkimin e dënimeve dhe dënimin e përgjithshëm prej 30 (tridhjetë) vite burgim.
Dënimi të vuhet në një burg të sigurisë së lartë.
Më datë 06.01.2024, autoritetet italiane arrestuan A.T. për ekstradim në Shqipëri, i cili u realizua më 13.09.2024.
Mbi kërkesën për “Rivendosjen e afatit të ankimit” të paraqitur nga përfaqësuesi ligjor i të dënuarit,Gjykata e Shkallës së Parë Tiranë, me vendimin nr. 1244, datë 10.12.2024, vendosi rivendosjen e të dënuarit A.T. në afat për të bërë ankim në Gjykatën e Apelit.
Në përfundim të shqyrtimit të çështjes në apel, Gjykata e Apelit të Juridiksionit të Përgjithshëm, me trup gjykues të përbërë nga Relatori Gjyqtar Fatri Islamaj dhe anëtaret Edlira Petri dhe Marsela Pepi, vendosi:
Lënien në fuqi të vendimit nr. 99, datë 17.06.2021 të Gjykatës së Rrethit Gjyqësor Krujë.
Tiranë, më 25.02.2025
Gjykata e Apelit të Juridiksionit të Përgjithshëm
