Dori Xhima
Tragjedia e ndodhur në Ksamil, ku 20-vjeçari Luis Miguel Varela Mendes humbi jetën pas një përleshjeje me thika me rojet e një kompleksi plazhi, nuk ekspozoi vetëm kaosin e sigurisë dhe përfshirjen e punonjësve të policisë si “truproja privatë” në bizneset e bregdetit.
Ajo solli në sipërfaqe edhe përdorimin e gjuhës zyrtare për të kontrolluar dëmin publik dhe për të “zbutur” impaktin mediatik.
Gjatë orëve të para pas krimit, i gjithë shtypi vendas dhe ai ndërkombëtar — i udhëhequr nga mediat franceze si “Le Parisien” apo “Nice-Matin” — raportuan se viktima ishte një “turist francez”.
Por vetëm pak orë më vonë, Policia e Shtetit nxitoi të lëshonte një njoftim korrigjues me një precizion të pazakontë: i riu nuk ishte francez, por shtetas me pasaportë portugeze.
Pse ky ngulmim për “saktësim kombësie”?.Në pamje të parë, korrigjimi i Policisë mund të duket si një detyrim i thjeshtë administrativ. Por në kontekstin e marrëdhënieve me publikun dhe imazhit të turizmit, lëvizja lehtësisht lexohet si një përpjekje për të ulur temperaturën mediatike.
Për opinionin publik shqiptar dhe për kancelaritë perëndimore, titulli “Vritet turisti francez në Ksamil” ka një peshë mjaft më të rëndë dhe krijon një tronditje gjeopolitike më të madhe se sa identifikimi i tij sipas vendlindjes së prindërve. Përmendja e Francës — një prej fuqive kryesore të BE-së dhe burim i madh i prurjeve turistike — rriste menjëherë presionin mbi Ministrinë e Brendshme.
Në mënyrë pothuajse instinktive, aparati i komunikimit publik në Tiranë u kap pas pasaportës portugeze të 20-vjeçarit (i cili jetonte, studionte dhe udhëtonte me grup shokësh nga Nica e Francës), si për t’i thënë publikut se goditja nuk ishte “kaq e rëndë”.
Realiteti që nuk e mbulojnë dot “saktësimet”
Pavarësisht nëse Viktima ishte francez apo portugez, thelbi i krimit mbetet i pandryshuar dhe alarmant, sidomos për faktin që shteti është.në shërbim të fortëve të plazhit.
I arrestuar si bashkëpunëtor në ngjarje dhe në ndihmën për largimin e autorit është një efektiv policie (ndihmës specialist hetimi), i cili punonte pa leje si roje sigurie në të njëjtin objekt. Ky është rast i përsëritur.
Përpjekjet zyrtare për të nuancuar kombësinë e viktimës nuk mund ta zbehin faktin se në mes të sezonit turistik, një i ri u vra në një ambient publik nga persona që duhet të garantonin rendin, me ndihmën e vetë punonjësve të policisë.
E vërteta e kësaj ngjarjeje nuk matet me pasaportën e viktimës, por me dështimin e shtetit për të garantuar jetën në plazhet shqiptare.
DITA
