Gjykata e Fierit ka lënë në burg Mariglen Muhametaj, autorin e vrasjes së të atit, Qemal Muhametaj 73 vjeç, në fshatin Greshicë të Mallakastrës.
37-vjeçari është paraqitur i vetëm në gjykatë këtë mëngjes, i pashoqëruar nga asnjë i afërm apo familjar, ndërsa i është caktuar një avokat kryesisht.
“Ça u bë, u bë”, është shprehur Muhametaj, duke mos shfaqur asnjë pendesë për krimin e kryer.
Ngjarja e rëndë u regjistrua mbrëmjen e 25 gushtit rreth orës 21:30 në fshatin Greshnicë në Mallakastër.
Gjatë marrjes në pyetje nga ekspertë të policisë, Mariglen Muhametaj është shprehur se shkak është bërë një zënkë e çastit më të atin.
I ndjeri Qemal Muhametaj, i ka thënë të birit të gjejë punë e të mos rrijë kot.
Në debat e sipër, Marigleni e ka shtyrë me duar me forcë të atin, i cili ka rënë përdhe. Autori ka marrë një pllakë betoni duke e goditur dy herë në kokë e duke i marrë jetën në vend.
37-vjeçari u arratis pas krimit, mirëpo u vu në pranga pas disa orësh kërkimi.
j.l./ dita
