Ish-shefi i Komisariatit të Himarës Arjan Tase, i cili vrau me skaf një vajzë 7-vjeçare në plazhin e Potamit ka dalë sot para gjykatës për t’u njohur me masën e sigurisë. Tase pritej të dilte para gjykatës mëngjesin e sotëm, por dhënia e masës së sigurisë për të është shtyrë në orën 11:15.
Ndërkohë që Prokuroria e Vlorës pritet të ashpërsojë akuzën që do të rëndojë ndaj Arjan Tases. Fillimisht Agjencia e Mbikëqyrjes Policore ngriti akuzën e “vrasjes nga pakujdesia”, vepër penale që parashikon deri në 5 vite burg, por mund të dënohet edhe me gjobë, por sot Prokuroria pritet që mbi Tasen të ngrejë akuzën e “vrasjes me dashje”. Kjo vepër penale dënohet nga 10-20 vite heqje lirie.
Ngjarja e rëndë ndodhi më 2 gusht në Plazhin e Potamit. E mitura, Jonada Avdia po lahej në det kur u përplas fillimisht nga pjesa ballore e gomones, e më pas trupi i saj është prerë nga helikat duke ndërruar jetë në vend.
Për këtë ngjarje të rëndë është shkarkuar i gjithë zinxhiri drejtues i Policisë Kufitare të Vlorës, si edhe inspektorët përgjegjës, por protestuesit kërkojnë 3 dorëheqje të tjera. Ndaj kryeministrit Edi Rama kërkohet dorëheqja e Bledi Çuçit, Mirela Kumbaros dhe Gledis Nanos. Ndërsa autori i ngjarjes, Arjan Tase po përballet me drejtësinë.
j.l./ dita
