Zëdhënësi i Bashkimit Europian, Petar Stano, të premten deklaroi se ndjen keqardhje që Lista Serbe nuk do të marrë pjesë në zgjedhjet për katër Komunat në Veri të Kosovës, mirëpo me këtë deklaratë të tij assesi nuk pajtohet presidenti serb, Aleksandër Vuçiç. “A i vjen pak turp kur deklaron se është i zhgënjyer që Lista Serbe dhe serbët nuk do të marrin pjesë në zgjedhje”, tha Vuçiç. Po ashtu, Vuçiç tha se “serbët në Kosovë janë në pozitë të vështirë për shkak se nuk do të marrin pjesë në zgjedhjet e së dielës”, edhe pse askush nuk i ka ndaluar që të jenë pjesë e këtyre zgjedhjeve. “Populli ynë nesër me qetësi, përgjegjësi dhe përbuzje do t’i shikojë ata që do të tërhiqen zvarrë nga Mitrovica e Jugut për të votuar dhe për të zgjedhur kryetarin në Mitrovicën Veriore, Leposaviq, Zveçan dhe Zubin Potok”, tha Vuçiç, transmeton media opozitare Nova. Ndërkaq, pas këtyre zgjedhjeve kreu i Serbisë potencoi se s’do të ndodh asgjë dhe shteti që ai e përfaqëson do të vazhdojë që t’i përkrahë serbët që jetojnë në Kosovë. “Çfarë do të ndodhë më pas, asgjë, një presion i plotë për të cilin njerëzit tashmë janë të gatshëm, të mësuar, do të jenë të qetë, do të jenë të përgjegjshëm, do të paguajmë rrogat si më parë, do të luftojmë edhe më shumë për ta, do t’i ngremë standardet dhe të presim kohë më të mira në të cilat do të jenë të vlefshme Karta e OKB-së dhe e drejta publike ndërkombëtare”, tha Vuçiç.
Tutje, ai tha se serbët në Kosovë deri më tani kanë marrë pjesë në disa cikle zgjedhore, por tani Vuçiç thotë se kjo “nuk do të duhej që të ndodhte pa u formuar Asociacioni i Komunave me Shumicë Serbe. Ndërsa, ai i bëri thirrje serbëve në Kosovë që “të kenë unitet”, dhe shtoi se “Evropa i dha Kosovës liberalizimin e vizave dhe anëtarësimin në Këshillin e Evropës”, dhe siç bëri të premten, ai përsëri iu referua kryeministrit të Kosovës me terma nazist. “BE-ja i shpërbleu me zgjedhje për të vendosur Gauleiterin e tyre okupues në të katër komunat në veri të Kosovës”. Ndryshe, të dielën, 23 prill, mbahen zgjedhjet lokale të jashtëzakonshme në 4 komuna. Siç ka njoftuar Komisioni Qendror Zgjedhor, për shkak të sigurisë, shumica e vendvotimeve do jenë në kontejnerë të improvizuar. Nevoja për zgjedhje erdhi pas bojkotit të orkestruar nga serbët në institucionet e Kosovës, në të gjitha nivelet. Lista Serbe, partia më e madhe e serbëve të Kosovës, ka vendosur të mos marr pjesë në zgjedhje. Kjo ka ngritur pikëpyetje për legjitimitetin e zgjedhjeve, nëse numri i atyre që dalin të votojnë do të jetë fare i vogël.
