Presidenti i Serbisë, Aleksandër Vuçiç ka bërë hap pas për uljen e tensioneve në veri të Kosovës, ku serbët kanë protestuar prej më shumë se dy javësh.
Ai i është përgjigjur kërkesave të SHBA-së dhe QUINT-it për të ulur gjendjen e gatishmërisë për luftë të ushtrisë së Serbisë.
Këtë vendim, Vuçiç e mori pas tensioneve në Veri kur Qeveria e Kosovës i dërgoi me pjesëtarë të njësisë speciale kryetarët e komunave në zyrat e tyre. Presidenti serb ka thënë gjithashtu se është i gatshëm por me një kusht, që kryetarët e zgjedhur në komunat në Veri të japin dorëheqjen.
Presidenti i Serbisë, Aleksandër Vuçiç ka folur për propozimin e kryeministrit të Shqipërisë, Edi Rama për Asociacion. Në një intervistë për televizionin serb ‘TV Happy’, ai tha se e respekton kryeministrin Rama por që nuk është i autorizuar të hartojë statutin e Asociacionit të komunave me shumicë serbe.
Vuçiç tha gjithashtu se Rama nuk është anëtar i Ekipit Menaxhues dhe kësisoj nuk mund të bëjë draf-statut për Asociacionin.
“Me sa di unë, Edi Rama nuk është anëtar i Ekipit Menaxhues Serb. As kryeministri i Kosovës Albin Kurti, i cili duket se dëshiron të bëhet pjesë e atij ekipi, pasi edhe ai ka diçka të shkruar, por nuk ka të drejtë ta ketë të shkruar. Nuk kemi çfarë të negociojmë këtu. Na jepni vetëm parimet dhe organet e Asociacionit siç janë negociuar dhe siç e kam inicializuar në vitin 2015 me (në atë kohë kryeministrin e Kosovës) Isa Mustafa. Nuk kërkojmë asgjë më shumë. A e dini se kur do të jetë? Asnjëherë, sigurisht jo derisa Kurti është në pushtet”, ka thënë Vuçiç për TV Happy.
Më datë 8 Qershor kryeministri i Shqipërisë, Edi Rama zbuloi se ka bërë gati draftin për Asociacionin e Komunave serbe në Veri të Kosovës. Ky draft, që synon zgjidhjen e krizës në Kosovë është hartuar pa marrë dakordësinë e kryeministrit Albin Kurtit. Kreu i Qeverisë shqiptare, pretendon se draftin që ka përpiluar vetë me ekspertë amerikane, ua ka dorëzuar Gjermanisë e Francës, si dhe në ditët në vijim do informojë edhe presidentin e KiE, Charles Michel.
Ky dokument konfidencial, sipas Ramës nuk do të bëhet kurrë publik. Nga ana tjetër, kryeministri i Kosovës, Albin Kurti tha se mund ta thellojë draft-vizionin e paraqitur nga ai për Asociacionin e komunave me shumicë serbe, por së pari, sipas tij, duhet të ketë pajtueshmëri mes palëve. Ai nuk e komentoi draftin e përgatitur nga Rama.
j.l./ dita
