Xhaxhai i Fatjon Muratit, Sahit Murati, i cili mbeti i plagosur mbrëmjen e së dielës gjatë një atentati në lokalin e nipit të tij në “Don Bosko”, ka dhënë dëshminë e tij para oficerëve të Policisë.
Ai ka treguar se nuk kishte mundur të shikonte asgjë identifikuese nga silueta e dy personave që qëlluan drejt lokalit ku ndodhej. Sahit Murati, i cili dyshohet nga policia se ishte objektiv i këtij atentati, ka treguar se në lokal ndodhej pasi po shikonte një ndeshje futbolli dhe ka dëgjuar krisma të forta, si dhe thyerjen e xhamave, Murati ka rrëfyer se është shtrirë në dyshime, duke mos pasur asnjë mundësi të shikonte personat që qëlluan, por edhe të reagonte karshi tyre. Gjithashtu ka pohuar se ai dhe familja e tij nuk kanë konflikte me askënd. Kujtojmë se atentati mafioz ndodhi gjatë mbrëmjes të së dielës, ku dy persona kanë qëlluar me breshëri kallashnikovi në drejtim të lokalit të Fatjon Muratit. Si pasojë e të shtënave mbeti e vrarë Mimoza Paja, banakierja e lokalit, si dhe u plagosën 5 persona të tjerë.
