‘Za fest’ në Shkodër ‘pushton’ Kalanë e Rozafës me spektatorë edhe nga jashtë vendit

Festivali që ul këmbëkryq legjendat, poezinë, muzikën, kinemanë, “Zâ Fest”, u rikthye edhe këtë vit në edicionin e tij të gjashtë duke i dhënë “Zâ” Shkodrës, qytet i cili u shndërrua në pikën e takimit të kulturave dhe në tre ditë rresht (nga 28 korriku deri më 30 korrik), kundruesit e shumtë shijuan spektaklin.

“Za Fest” “pushtoi” Kalanë Rozafa në edicionin e 6-të të tij, me praninë e spektatorëve të shumtë në numër që kishin ardhur enkas për të shijuar një spektakël të mirëfilltë artistik, jo vetëm nga Shkodra, por edhe nga jashtë vendit.

Shtëpia e doktor Frederik Shirokës dhe kalaja e Rozafës ishin dy skenat e këtij viti, ndërsa elementët e veçantë të dekorit skenografik, efektet e dritave, cilësia e pastër e tingullit të zërit dhe një publik, i gjithi në festë, kanë qenë detajet kryesore të këtyre netëve.

Ndonëse është hera e tretë që artistja e njohur Elina Duni këndon në “Za Fest”, për herë të parë performoi në Shkodër.

“Jam shumë e lumtur që po luaj në kalanë e qytetit të Shkodrës. Është hera e tretë që un luaj në ‘Za Fest’ kam qenë një nga muzikantët që kam luajtur më shpesh. Është hera e parë që luaj në Shkodër, kam shumë emocione dhe mezi po pres në fakt”, është shprehur këngëtarja Elina Duni.

Magjia e “Za Fest” vijoi me artistë të tjerë ku mes tyre edhe Vlashent Sata, drejtori artistik i “Za Fest” ndërsa kalaja “Rozafa” kumboi me muzikë deri orëve të vona të darkës. Za fest u përmbyll me interpretimin e këngëtarëve, Cristiana Verardo, Las Migas, Jericho, Bijat. Ky event vjen si një ndërthurje e folklorit shqiptar me elementë të muzikës moderne, me legjendat, poezinë dhe kinemanë.

Kantautori Vlashent Sata, i cili është edhe drejtori artistik i festivalit është shprehur se festivali me synimin e tij kryesor bashkimin e njerëzve, duke ftuar artistë vendës, fqinj e nga vende të ndryshme të botës, ka mundësuar kështu një bashkim të gjerë kulturor. Sipas tij, repertori i pafundmë i ritmeve, notave, poezisë, vokaleve, në tre net rresht pa dyshim ka përthyer çfarëdolloj barriere kulturore.

Festivali pluri-artistik ndër më magjikët në Shqipëri dhuroi këto net copëza magjie me këngë e surpriza.

Edhe kryeministri Edi Rama ndau dje pamje nga dy netët e para të këtij festivali ku kanë marrë pjesë mijëra qytetarë dhe artdashës.

“Sot nata e tretë plot tinguj në Kalanë magjepsëse të Rozafës, një festival i nisur nga hiçi pak vite më parë e i organizuar bukur, falë një djali energjik e plot ide, Vlashent Sata dhe mbështetjes së Ministrisë së Kulturës, po edhe falë këmbënguljes së deputetes Edona Bilali, shembull për t’u ndjekur nga të gjithë për angazhimin e pandërprerë në komunitet”, shkroi Rama në një postim në rrjetet sociale.

Momente nga “Za Fest” ka ndarë edhe ministrja e Kulturës Elva Margariti përmes postimeve në rrjetet sociale.

Zâ Fest

Zâ Fest është krijuar nga Vlashent Sata në gusht të vitit 2017. Kantautori Sata e nisi fillimisht me idenë e një koncerti që do të zgjonte ndjeshmërinë e vendësve dhe turistëve, mbi problematikën e plehrave që pas një ekskursioni të bukur linin një plagë në bukuritë thuajse të pacenuara natyrore.

Ky festival prej në edicionin e tij të gjashtë tashmë, rizgjon vlerat shqiptare, kultivon artin, i cili bashkon njerëzit në gjuhët e tij universale.