Ishte një mision me rrezik të lartë brenda Koresë së Veriut ndaj iu besua forcave speciale “Navy SEALs”, por që rezultoi një operacion i dështuar dhe që përfundoi me vrasjen e disa peshkatarëve.
Një histori sekrete që ka ndodhur në vitin 2019 dhe që është zbuluar tani në një artikull të “New York Times”.
Pjesa e parë e historisë ka të bëjë me diplomacinë. Në vitin 2018, Shtëpia e Bardhë kërkoi dialog me Phenianin, por amerikanët ishin “të verbër” se çfarë ndodhte në vendin komunist. Ata kishin pak informacione dhe kështu vendosën të kryenin një veprim të rrezikshëm, të autorizuar nga vetë presidenti Trump duke pasur parasysh pasojat e mundshme.
Pentagoni përgatiti një inkursion që iu besua “Ekipit 6” të Skuadronit të Kuq të Seal. Komandot do të zbarkonin në bregdetin e Koresë së Veriut dhe do të vendosnin një pajisje për të përgjuar komunikimet e udhëheqësit Kim Jong Un.
Skuadra u stërvit për muaj të tërë, të vetëdijshëm për vështirësitë, duke mos pasur gjasa të gjenin ndonjë mbështetje brenda një vendi të mbyllur dhe të ruajtur mirë.
Urdhri mbërriti në fillim të shkurtit, disa javë para samitit në Hanoi midis Kim dhe Donald Trump.
Një nëndetëse sulmuese iu afrua gadishullit në errësirë dhe dy mini-nëndetëse u lëshuan secila me nga 4 komando. Në mbështetje të tyre kishte një njësi përforcimi dhe një helikopter të fshehtë të vendosur në det të hapur. Ato ishin të gatshme për të ndërhyrë në rast emergjence.
Mini-nëndetëset mbërritën afër bregdetit, por njëra prej tyre u pozicionua keq, pak larg vendit ku ishte parashikuar. Sipas New York Times, këtu lindi problemi i parë. Komandot “zbarkuan” dhe ishin gati të kryenin detyrën e tyre.
Por aty erdhi problemi i dytë. I paparashikuar. Shfaqet një anije e vogël e Koresë së Veriut. Ata që ishin në bord mund të kenë vënë re diçka të çuditshme. Ata po përdorin fenerë dhe njëri prej tyre u hodh në det.
Ka shumë të ngjarë që mini-nëndetësja e dytë, e detyruar të lëvizë për të arritur pozicionin e paracaktuar, të ketë ngjallur dyshime.
Komandot nuk mundnin të komunikonin me komandantin në nëndetëse ndaj ushtari me gradën më të lartë hapi zjarr mbi anijen, i ndjekur menjëherë nga shoqëruesit e tij. Pastaj komandot arritën në trupin e anijes dhe pas një kërkimi të shpejtë, zbulojnë se kanë vrarë një grusht peshkatarësh dhe jo ushtarë.
Misioni shkoi keq dhe ekipi u kthye në nëndetësen mbështetëse pa probleme të mëtejshme.
Një hetim sekret i Pentagonit më vonë arriti në përfundimin se vrasjet ishin të justifikuara sipas rregullave të angazhimit.
Në ditët në vijim, satelitët spiunë vunë re një aktivitet intensiv nga anijet e Koresë së Veriut në zonë, por regjimi nuk raportoi asnjë lajm. Në fund të nëntorit, të dy presidentët u takuan në Vietnam, një takim i drejtpërdrejtë që përfundoi pa asnjë rezultat.
Hetimi pasues i Pentagonit zbuloi disa probleme të një iniciative padyshim të pamatur nga Shtëpia e Bardhë.
Së pari, problemet e komunikimit dhe zbulimi në segmentin e fundit. Kjo ndodhi sepse komandot nuk mund të përdornin çdo sistem në dispozicion të tyre, nga frika e zbulimit.
Së dyti, shfaqja e varkës së vogël në zonë: mbikëqyrja e gjerë satelitore dhe një studim i rrugëve të peshkatarëve kishin përjashtuar çdo prani të tillë.
Së treti, gabimet në manovrim, të cilat janë gjithmonë të mundshme në situata të tilla.
Nuk është e qartë se ku ndodhi zbarkimi; ndoshta mund të ketë qenë pranë Wonsan, ku Kim ka një vilë dhe një vend ankorimi për jahtin e tij dhe një shtëpi luksoze-lundruese. Ata thonë se është një nga vendet që ai e ka të dashur, pasi është rritur atje.
Shkrimi i gazetës vjen vetëm disa orë pas udhëtimit triumfues të “Marshallit” në Pekin, ku ai mori pjesë në paradën e madhe së bashku me Xi Jinping dhe Vladimir Putin. Kjo është një njohje e rëndësisë së Koresë së Veriut në lëvizjen anti-perëndimore.
Do të shohim nëse artikulli i New York Times do ta shtyjë regjimin e Kim të prononcohet për shkeljen e rëndë të sovranitetit të tij, që përfshin një sulm të drejtpërdrejtë dhe vrasjen e civilëve.
