Vrima e zezë më e madhe e zbuluar ndonjëherë nga njerëzimi, mund të krahasohet me 30 miliardë diej. E zbuluar së fundmi nga shkencëtarët e NASA-s, forca që kjo materie e zezë dhe e panjohur, ushtron ndaj çdo gjëje që ka përreth është e jashtëzakonshme, – thonë shkencëtarët.
Astronomët thanë se sapo kanë zbuluar se cila mund të jetë vrima e zezë më e madhe e njohur deri më sot. Vrima e zezë gjigante ka një masë prej 30 miliardë diejsh dhe ndodhet në qendër të një galaktike disa qindra miliona vite dritë nga Toka.
Astronomët e quajnë “përbindëshi kozmik”. Është një vrimë e zezë ultra-masive, në krahasim me vrimat e zeza supermasive të zakonshme galaktike. Astronomët e zbuluan gjatë vëzhgimeve të një galaktike të përqendruar rreth vrimës së zezë përbindësh, duke përdorur metodën e “lentes gravitacionale”.
Kjo metodë është rezultat i gravitetit që përkul dritën rreth objekteve jashtëzakonisht masive. Duke shërbyer si teleskop natyral, lentet gravitacionale i ndihmojnë astronomët të zmadhojnë objekte shumë të largëta, për t’i bërë të dukshme, për teleskopët e prodhuar nga njeriu.
“Kjo vrimë e zezë e veçantë, afërsisht 30 miliard herë më e madhe se masa e diellit tonë, është një zbulim jashtëzakonisht emocionues”, – tha James Nightingale, astrofizikan në Universitetin Durham në MB.
Shkencëtarët nuk janë ende në gjendje të thonë nëse një vrimë e këtyre përmasave rrezikon në të ardhmen “të gëlltisë” edhe Tokën. Por edhe pse e stërmadhe, vrima e zezë nuk është shumë aktive, që do të thotë se nuk po “gëlltit” shumë material. Për këtë arsye, ajo nuk prodhon aktualisht rrezatim të fortë me rreze X.
“Shumica e vrimave të zeza më të mëdha që njeh njeriu janë në gjendje aktive. Materia e tërhequr afër tyre lëshon energji në formën e dritës, rrezeve X dhe rrezatimeve të tjera”, tha astronomi Nightingale.
Gjetjet u publikuan të mërkurën, më 29 mars, në revistën Monthly Notices of the Royal Astronomical Society.
k.a. / dita
