E ka fituar ndeshjen e parë në fushë të huaj, 2-1 mesjavën e shkuar ndaj Valmierës, por, për trajnerin e Partizanit, Zoran Zekiç, ndeshja e së enjtes duhet luajtur deri në fund.
“Çfarë mund të themi për Valmerian? Ne kemi një rezultat të mirë nga ndeshja e parë, ajo tashmë i përket së shkuarës, sepse të enjten është një ndeshje e re. Duhet të jemi të përgatitur për këtë ndeshje, të përqendrohemi dhe të jemi seriozë, sa më të bashkuar dhe të përmisojmë disa gjëra dhe shpresoj për më të mirën”, tha tekniku kroat.
49-vjeçari ka pohuar mungesën e Mbasë, por i beson grupit që ka në dispozicion. “Nuk është se kemi vetëm një problem, mungesën e Mbasë, probleme ka boll, por ne mundohemi të bëjmë maksimumin me këtë grup që kemi, të jemi një skuadër e bashkuar, t’u përmbahemi skemave taktike dhe të kemi një ndeshje të mirë të enjten”, arsyetoi Zekiç.
Kroati ka këmbëngulur që skuadra të mos lejojë të vetëkënaqet. “Valmiera është një skuadër e mirë dhe ne duhet të tregojmë respekt për kundërshtarin, pavarsisht fitores në ndeshjen e parë, sepse kur respektojmë kundërshtarin, kemi respektuar veten. Por të enjten duhet të luajmë me zgjuarsi, me vendosmëri dhe të mos vetkënaqemi”, tha trajneri.
Skuadra e tij e ka humbur ndeshjen e parë në shtëpi, 1-2 mesjavën e shkuar përballë Partizanit, por trajneri i Valmierës, Jurgis Kalns e shikon të hapur çështjen e kualifikimit.
“Është 50 me 50 nëse më pyesni si i shoh shanset për kualifikim. Partizani e fitoi ndeshjen e parë, por është vetëm një gol që i ndan të dyja skuadrat, një gol që mund të rikthejë gjithçka në barazpeshë. Ne gabuam në ndeshjen e parë në shtëpi, por unë e njoh skuadrën time dhe ajo është e aftë për ta përmbysur rezultatin”, tha trajneri i Valmieras.
40-vjeçari ka theksuar se ndeshja e kthimit i gjen të dy ekipet në pozita të ndryshme. “Ndeshja e parë ishte në fakt një përballje të panjohurash, si për ne, ashtu edhe për Partizanin. Ne e kishim studiuar lojën e njëri-tjetrit nga larg, por fusha e lojës tregoi diçka tjetër. Tanimë unë mund të flas ndryshe për skuadrën e Partizanit dhe për atë që do të kem përballë në fushën e blertë të enjten në mbrëmje. Sigurisht, e njëjta gjë vlen edhe për homologun tim. Prandaj që do të jetë një ndeshje interesante. Ne i kemi studiuar të gjitha pikat e forta të Partizanit dhe sesi do të përballemi me ta”, pohoi Kulns.
Ndeshja Partizani- Valmiera luhet të enjten në Stadiumin “Elbasan Arena”, duke nisur nga ora 20:00.
