Zgjedhjet e 11 majit, zgjatet afati i vlefshmërisë së dokumenteve biometrikë

Ministri i Brendshëm, Ervin Hoxha, njoftoi vendimin e qeverisë për zgjatjen deri në 31 maj 2025 të afatit të dokumenteve biometrikë të skaduara, për t’u mundësuar të gjithë shqiptarëve që jetojnë në diasporë që të ushtrojnë të drejtën e votës, duke u regjistruar fillimisht në Platformën Elektronike të Regjistrave.

“Këshilli i Ministrave miratoi një akt shumë të rëndësishëm, për zgjatjen e afateve të vlefshmërisë së kartave te identitetit (ID), dhe pasaportave biometrike deri në 31 maj 2025. Kjo situatë do të zgjidhë shumë shpejt të gjithë këtë ngërçin e krijuar. Janë rreth 500 mijë shtetas shqiptarë, të cilëve u ka përfunduar vlefshmëria e kartave të identitetit.Në këtë mënyrë, me miratimin e këtij akti do të kenë mundësinë të gjithë shtetasit shqiptarë, që jetojnë jashtë vendit për të ushtruar të drejtën e votës si një e drejtë kushtetuese.Me miratimin e këtij akti të gjithë shtetasit shqiptarë do të votojnë sipas udhëzimeve të KQZ-së, duke u regjistruar në Platformën Elektronike të Regjistrimit, të Komisionit Qendror të Zgjedhjeve”, tha ministri Hoxha.

I pyetur për propozimin e PD-së që të votojnë edhe shqiptarët të cilët jetojnë jashtë, por s’kanë dokumente shqiptare, ministri tha se kjo është e pamundur.

“Ligji nuk e parashikon. Të gjithë shtetasit shqiptarë të cilët kanë kartë identiteti të pavlefshme dhe pasaporta biometrike të pavlefshme, pas miratimit të aktit që ne bëmë sot do të kenë mundësi të regjistrohen në platformën e Komisionit Qendror të Zgjedhjeve sipas udhëzimeve të KQZ”, tha Hoxha.

Sa i përket protestës së PD-së të thirrur të shtunën e 8 shkurtit ministri Hoxha tha:

“Janë dy ndodhi të ndryshme. Gënjeshtra dhe marshimet për të ushtruar të drejtën dhe për partitë e vogla nga njëra anë, dhe protesta e datës 8 shkurt, ku është detyrim i Policisë së Shtetit për të marrë masat për mbarëvajtjen e kësaj proteste duke respektuar të drejtën e protestimit dhe të drejtën e tubimit për çdo shtetas shqiptar. Faleminderit”.

i.b./dita