Qarkullimi i automjeteve në aksin Durrës–Tiranë do të ndërpritet përkohësisht gjatë netëve të 6 dhe 7 gushtit, për shkak të punimeve për ndërtimin e mbikalimit të ri të Kasharit, pjesë e projektit për zgjerimin e autostradës.
Sipas Autoritetit Rrugor Shqiptar, bllokimi do të jetë nga mesnata deri në orën 04:30. Gjatë këtij intervali do të kryhet montimi i trarëve metalikë të mbikalimit, duke bërë të nevojshëm pezullimin e lëvizjes në dy korsitë e drejtimit Durrës–Tiranë. Ndërkohë, qarkullimi nga Tirana drejt Durrësit do të vijojë normalisht.
Për të shmangur bllokimin e plotë të trafikut, automjetet që udhëtojnë nga Durrësi drejt Tiranës, Aeroportit “Nënë Tereza” dhe Kosovës do të devijohen në rampat e autostradës Thumanë–Kashar.
Mjetet me destinacion aeroportin dhe Kosovën do të vijojnë itinerarin në autostradën Kashar–Thumanë, ndërsa drejtuesit që kanë destinacion Tiranën do të orientohen përmes sinjalistikës së përkohshme në rrugën dytësore, për t’u rikthyer më pas në autostradë pas mbikalimit të Kasharit.
Autoriteti Rrugor Shqiptar u bën thirrje drejtuesve të mjeteve, bizneseve dhe banorëve të zonës të tregojnë mirëkuptim dhe të respektojnë sinjalistikën e vendosur gjatë zhvillimit të punimeve.
“Në vijim të realizimit të punimeve për ndërtimin e objektit:“Zgjerimi i Superstradës Tiranë-Durrës (Faza III)”, është i nevojshëm zbatimi i Planit të Menaxhimit të Trafikut.
Më datë 6 dhe 7 gusht 2026, nga ora 00:00 deri në 04:30, do të kryhet montimi i trarëve metalik të mbikalimit të ri të Kasharit, për zbatimin e këtyre punimeve, si dhe për sigurinë rrugore është i nevojshëm bllokimi i dy korsive të aksit kryesor në drejtimin Durrës-Tiranë.
Gjatë këtij intervali, trafiku që lëviz nga Durrësi në drejtim të Tiranës, Aeroportit “Nënë Tereza” dhe Kosovës do të devijohet në rampat e autostradës Thumanë-Kashar.
Mjetet me destinacion Aeroportin dhe Kosovën do të vijojnë lëvizjen në autostradën Kashar-Thumanë, ndërsa automjetet me destinacion Tiranën do të orientohen me sinjalistikën e përkohshme në rrugën dytësore duke u rikthyer në autostradën Durrës–Tiranë pas mbikalimit të Kasharit”, njofton ARRSH.
j.l./ dita
