Ervin Skela duket i tërhequr nga jeta sportive e Shqipërisë. Aktualisht u bënë disa vite që ai punon si trajner i moshave te Eintraht Frankfurt.
Në një intervistë për gazetën sportive Panorama ai shpreh zhgënjimin që nuk iu ofrua asgjë nga FSHF pasi la futbollin aktiv në Shqipëri.
Më poshtë, pjesë nga intervista:
Ervin, pse jeni tërhequr kaq shumë nga Shqipëria? Jeni bërë pothuajse i padukshëm…
Kështu mund t’ju duket juve, unë thjesht nuk kam dashur që të përzihem dhe fundja askush nuk ka shfaqur interes për mua.
E keni fjalën për klubet shqiptare apo për federatën?
Shikoni, unë kam miq te Tirana dhe Flamurtari, por nuk e kam fjalën për klubet.
E keni fjalën për FSHF-në?
Po, nuk ka pasur asnjë interesim për mua.
Pse?
Nuk e di pse.
Pasi latë futbollin çfarë ndodhi me ju?
Ka qenë një periudhë e vështirë, në kuptimin që isha i pavendosur dhe i paqartë se çfarë do të bëja. Prisja që dikush, qoftë edhe për kontributin që unë kam dhënë në ekipin kombëtar, minimalisht të pyeste: “Çfarë do bësh, çfarë plani ke…?”
A ju telefonoi dikush?
Jo, për fat të keq, jo. Dhe u zhgënjeva disi. Unë jam njeri që e kam kulturën e punës, i respektoj njerëzit dhe përpiqem gjithnjë që të mësoj sa më shumë. Mirëpo, ajo periudhë, që është një nga më të vështirat për çdo futbollist profesionist që lë futbollin, ishte edhe një moment reflektimi.
a.d. / dita