Zjarrfikësit italianë po luftojnë për të shuar një zjarr të madh pyjor në Toskanë që është ndezuar prej ditësh i nxitur nga erërat e forta, duke detyruar evakuimin e rreth 3,000 njerëzve.
Zjarri, aktiv që nga e marta, është përhapur në mbi 800 hektarë në malin Faeta, që shtrihet midis provincave të Luccës dhe Pizës, tha kryebashkiaku i një qyteti fqinj, San Giuliano Terme.
Ka të ngjarë që kjo të jetë provokuar nga djegia e krasitjeve të ullinjve që doli jashtë kontrollit, tha Matteo Cecchelli për transmetuesin publik RAI.
Gjatë natës, erërat e forta e ushqenin zjarrin, duke shkaktuar evakuime paraprake, tha në një deklaratë presidenti rajonal i Toskanës, Eugenio Giani.
Tre aeroplanë zjarrfikës Canadair , të cilët mbledhin ujë nga liqenet, lumenjtë ose detet përpara se ta hedhin mbi zjarre, ishin vendosur për të mbështetur stafin në tokë, tha departamenti kombëtar i zjarrfikësve në X.
“Zjarri është ende shumë aktiv”, tha nënkryetari i bashkisë së Lucca-s, Fabio Barsanti, në një video në Facebook.
“Po bëhen të gjitha përpjekjet për të përmbajtur sa më shumë të jetë e mundur perimetrin e zjarrit, por nuk mund të relaksohemi ose të bëjmë parashikime sepse jemi në mëshirën e erës”, tha ai.
j.l./ dita
