Një person është filmuar në këto pamje mes zjarrit në zonën e Sazanit.
Sipas Ministrisë së Mbrojtjes ai është zjarrvënës, por në fakt rezulton të jetë zjarrfikës.
Madje sipas njoftimit që është shpërndarë nga zyra e shtypi te Ministria e Mbrojtjes, e dërguar gazetarëve privatisht, thuhet se Policia ka nisur menjëherë hetimet për të zbuluar autorin apo autorët e kësaj zjarrvënnie që mori përmasa të mëdha.
Por në fakt ne pamje duket zjarrfikësi Luan Kapaj, i njohur për heroizmin e tij duke shpëtuar disa njerëz në rrënojat e shkaktuara nga tërmeti i 26 nëntorit 2019. Ai po ndizte një zjarr të kontrolluar. Një djegie e kontrolluar është një zjarr i vendosur qëllimisht për të hapur breza dhe për të penguar zjarrin e madh që të shpërndahet në të gjithë zonën.
Në dhjetor 2019 kryeministri Edi Rama i ka dhënë atij medaljen e artë të vlerësimit profesional zjarrfikësit të Vlorës, pasi mori pjesë në operacionet e kërkim shpëtimit për të nxjerrë njerëzit nga rrënojat në Durrës pas tërmetit tragjik të 26 Nëntorit.
Këtë dekoratë e mori për herë të parë një individ, pasi më parë e morën ekipet e kërkim shpëtimit të vendeve të huaja që ndihmuan pas tragjedisë.
“Ndodh që kur dikush bën mirë një punë, njerëzit thonë ‘detyrën po bën’, por dallimin e bën pikërisht përkushtimi dhe cilësia në kryerjen e detyrës.
Me shumë respekt dëshiroj të dorëzoj këtë medalje dhe të them se jam i privilegjuar dhe i prekur që jam pranë teje, sepse në kushtet e jetës së përditshme njerëzit si ti janë thjeshtë në jetën e tyre dhe ne rrallë i shohim. Të jam shumë mirënjohës dhe të falënderoj për gjithçka”, i tha Rama.
Ja teksti te shperndare nga stafi e ministrisë
”Një video që dyshohet të jetë bërë nga punonjës të operacioneve të fikjes së zjarreve ka zbuluar një person që dyshohet të jetë autor njërës prej zjarrvënieve në ishullin e Sazanit. Policia bën me dije se ka nisur menjëherë hetimet për të zbuluar autorin apo autorët e kësaj zjarrvënnie që mori përmasa të mëdha. Nga videoja e siguruar, personi duket që del nga një vatër e sapondezur zjarri. Ende nuk dihen shkaqet që e kanë detyruar atë të ndërmarrë një veprim të tillë, por Kodi Penal në fuqi parashikon ndëshkime deri në 20 vite burg për autorët e djegies së qëllimshme të pyjeve dhe bimësisë në Shqipërië.
Konkretisht, neni 206/a i Kodit Penal, ndryshuar për herë të fundit në vitin 2013, parashikon 5 deri në 8 vite burg për shkatërrimin me dashje përmes zjarrit, të fondit pyjor dhe të çdo njësie të ngjashme me të, me pasoja të rënda materiale. Kur zjarrvënia është kryer me qëllim ndryshimin e kategorisë dhe destinacionit të tokës, nga pyll në kullotë, truall etj., parashikohet një dënim me burg nga 5 deri në 15 vjet. Ndërkaq, kur vënia e zjarrit të qëllimshëm ka shkaktuar pasoja të rënda për pronën, shëndetin ose jetën e njerëzve apo dëme të rënda dhe të zgjatura në kohë ndaj mjedisit, dënohet nga 10 deri në 20 vjet burg.”
o.j/dita
