Nga Migena Aleksi
Botuar në DITA
Me padinë që Erion Veliaj ka paraqitur në Gjykatën Kushtetuese, procesi për caktimin e një date për zgjedhjet në Bashkinë e Tiranës është përfshirë në një ngërç ligjor.
Sipas ligjit shqiptar, kur ekziston një ankim apo proces gjyqësor që lidhet me legjitimitetin e mandatit ose me vendimin për shkarkim, nuk mund të zhvillohen zgjedhje të reja derisa çështja të marrë zgjidhje përfundimtare nga gjykata.
Në këtë situatë, sytë janë kthyer nga Presidenti Bajram Begaj, i cili ka kompetencën për të dekretuar datën e zgjedhjeve.
Presidenti përballet me një dilemë institucionale: të respektojë afatet për organizimin e zgjedhjeve, apo të presë vendimin e Gjykatës Kushtetuese, për të shmangur një proces që mund të rezultojë i pavlefshëm më pas.
Çfarë do bëj kreu i shtetit: Një dekret për datën mund të minojë besimin në procesin elektoral, të prodhojë tensione politike dhe të ekspozojë institucionin e Presidentit ndaj akuzave për njëanshmëri. Në të kundërt, një qëndrim i kujdesshëm dhe i arsyetuar – pra, mosdekretimi i datës derisa të ketë një vendim gjykate – do të ruante integritetin institucional dhe do të dëshmonte respekt për shtetin ligjor.
Në këtë kontekst, Presidenti nuk ka luksin e një vendimi formal. Çdo hap i tij do të përbëjë precedent institucional dhe duhet të bëhet me vetëdijen se ndikon drejtpërdrejt në legjitimitetin e zgjedhjeve dhe në besimin e qytetarëve te demokracia përfaqësuese.
Nëse demokracia do të funksionojë siç duhet, nuk ka nevojë për zgjedhje të shpejta – por për zgjedhje të drejta.
—–
©️Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
