6 shpërthime në veri të Kosovës, Kurti: Sulmet po dirigjohen nga Serbia dhe presidenti i saj! Vuçiç: I urdhëroi Prishtina!

Gjashtë shpërthime janë raportuar në veriun e Kosovës përkatësisht dy në  Zubin Potok, ndërsa 4 të tjera në Mitrovicë të Veriut. Të dyja komuna të banuara me shumicë serbe në pjesën veriore të Kosovës.

Kryeministri Albin Kurti ka reaguar për situatën mjaft të tensionuar në veri të Kosovës ndërsa ka bërë fajtor vetëm Aleksandër Vuçiç i cili po paguan bandat kriminale.

Kurti shkruan se qeveria e Kosovës s’po bën pazare dhe si ka bërë ndonjëherë dhe se sulmet nuk janë gjë tjetër veçe tregues i pafuqisë popullore të Serbisë.

“Bandat kriminale kanë intensifikuar sulmet në veri të Kosovës. Ato e dinë se po ju vie fundi. Qeveria e Kosovës as s’bën pazare me to dhe as s’i duron ato. Bombat që hedhin, plumbat që shkrepin dhe maskat që vendosin janë pafuqia e tyre politike e popullore. Me këto krime e sulme të armatosura në veri të Ibrit, doemos do të kemi më shumë polici të Kosovës atje. Sepse do të ketë hetime e ndjekje të këtyre kriminelëve, që paguhen nga Serbia e dirigjohen nga presidenti i saj. Shkeljet e shumta të ligjit nuk do të falen kurse tendencat për destabilizim kriminal do të dështojnë. Në katër komunat në veri nuk është ndarja në serbë e shqiptarë, por në banda kriminale dhe qytetarë. Kërkoj nga të gjithë qytetarët e Kosovës që të mbështesin shtetin dhe policinë e Kosovës, të gjithë zyrtarët tanë që po mbrojnë kushtetutshmërinë dhe ligjshmërinë, republikën dhe demokracinë.”- shkruan Kurti.

Sipas raportimeve, shpërthimet në Zubin patok erdhën gjatë kohës kur anëtarë të Komisionit Komunal Zgjedhor, të shoqëruar nga pjesëtarët të Policisë së Kosovës, hynë në hapësirën e objektit komunal. Burime të REL-it thanë se në Mitrovicën e Veriut u dëgjuan sirena alarmuese para orës 15:00. Për 5 shpërthimet e njëpasnjëshme ka reaguar dhe presidentja Vjosa Osmani. Sulmi ka ardhur nga Serbia dhe është i orkestruar nga Presidenti Serb, Aleksandër Vuçiç sipas Osmanit dhe Kurtit.

Ndërkohë një deklaratë ka pasur edhe nga Presidenti Vuçiç i cili u shpreh se shpërthimet ndodhën me urdhër të Kurtit.

 “Sot përsëri, në kundërshtim me marrëveshjen e Brukselit, janë dërguar oficerë policie të armatosur në veri. Siç thashë dje, ju thjesht pyesni se në cilën ditë do të ndodhë ndonjë provokim i ri që mund të prishë stabilitetin dhe paqen. Është mirë që, të paktën sipas të dhënave aktuale nuk ka viktima dhe besojmë se do të mbetet e tillë. Për sa i përket kohës nuk e dimë se çfarë kanë në mendjen e atyre personave që duan të shkaktojnë konflikte çdo javë. Nuk është një periudhë e lehtë përpara ne, por është e rëndësishme që të qëndrojmë me popullin tonë dhe të pajtohemi me shqiptarët për gjithçka që është e mundur që paqja të ruhet dhe të ruhet. Gjithashtu besoj se Miroslav Lajçak do të luajë një rol të rëndësishëm në qetësimin e situatës”, tha Vuçiç.

a.m/dita