Pyetja që qarkullon në këto momente ndër specialistët e futbollit, është nëse Pep Guardiola mund të cilësohet tekniku më i madh i të gjitha kohërave, për më tepër kur ndodhet në mes të karrierës si trajner dhe ka fituar më shumë se kushdo tituj. E nëse realizon tripletën në Manchester City këtë sezon, askush s’do ketë më dyshime. Me të duhet vetëm pak durim dhe në fund padyshim që del i fituar. Këtë durim e pati Barcelona, tani e ka dhe City (e ka nxjerrë dy herë në finale Champions, kur deri pak vite më parë nuk kishte veç disa tituj modestë). Atë durim që fatkeqësisht s’e pati Bajern…
Ky sezon nuk ishte i lehtë për Manchester Cityn sa i takon Premier Leagues. Dukej sikur të besuarit e trajnerit Pep Guardiola do të dorëzoheshin përballë Arsenalit që në një pikë të caktuar të sezonit arriti të ishte edhe tetë pikë para The Citizens. Megjithatë, djemtë e trajnerit Pep Guardiola arritën përmbysjen e madhe dhe të shtunën festuan titullin e tretë radhazi dhe të pestin në gjashtë vitet e fundit.
Një arritje e madhe kjo edhe e teknikut spanjoll që konfirmohet si një nga më të mirët e profesionit të tij, në mos më i miri. Në fakt të gjitha statistikat janë në anën e tij dhe nëse kthen kokën pas, vë re se Guardiola ka fituar 11 nga 14 kampionatet e fundit. Duke nisur nga Barcelona, Bayern Munich dhe tashmë City. 52-vjeçarin kanë mundur ta ndalin vetëm tre kolegë.
Kështu, në sezonin 2011/2012 teksa ishte në drejtimin e Barcelonës, Guardiola e humbi kampionatin përballë Realit të Jose Mourinhos. Ndërkohë, dy disfatat e tjera janë në Angli pasi me Bayernin nuk mundi ta ndalte askush. Në ndrejtimin e Manchester Cityt, sa i takon Premier Leagues, Guardiola është mposhtur vetëm nga Chelsea i Antonio Contes në sezonin 2016/2017 dhe nga Liverpooli i Jurgen Klopp në sezonin 2019/2020.
