Një tjetër efektiv i policisë ka humbur jetën fatkeqësisht në aksident rrugor, ne dukje teksa kthehej nga puna. Ngjarja e rëndë ndodhi pasditen e sotme, teksa mjeti i 62-vjeçarit është përplasur me një trajler në aksin Korçë-Bilisht, në afërsi të fshatit Neviçisht. Mësohet se mjeti i tonazhit të rëndë po udhëtonte nga Korça në drejtim të fshatit Pojan, ndërsa mjeti i vogël i markës “Opel”, nga Zëmblaku në drejtim të Korçës.
Policia beri të ditur se mjeti me drejtues oficerin e Policisë së Pikës Kufitare Goricë, Ilir Duni, po ecte në krahun e kundërt të rrugës nacionale ndërkohë që Vaskë (Vasillaq) Çunoti drejtues i mjetit të tonazhot të rëndë për të shmangur goditjen ka kërkuar ta kalojë mjetin trajler në krahun e kundërt të aksit rrugor. Devijim ky që nuk ka arritur të shmangë përplasje e mjetit të vogël me mjetin e tonazhit të rëndë.
Nga përplasja, mjeti është përfshirë nga flakët dhe u desh nderhyrja e shërbimit zjarrfikës për të fikur zjarrin. Goditja ka qenë aq e fortë sa 62-vjeçari Ilir Duni që udhëtonte i vetëm në mjet ka gjetur vdekjen e menjëhershme. Policia ka shoqëruar në komisariat drejtuesin e trajlerit, i identifikuar si Vasillaq Çinoku, për të sqaruar rrethanat e këtij aksidenti. Ka dyshime të forta se efektivi mund të ketë pësuar komplikacione shëndetësore që humbi korsinë e tij dhe doli në të kundërt, duke gjetur karambolimin fatal. Por hetimet mbeten ende aktive.
