Një aksident i rëndë ka ndodhur pasditen e sotme në Burrel, ku dy automjete janë përplasur “kokë më kokë”, duke lënë të plagosur gjashtë persona, përfshirë edhe një fëmijë 8-vjeçar. Ngjarja ka ndodhur rreth orës 19:10, në vendin e quajtur “Ish Agjencia”.
Sipas Policisë së Matit, në aksident janë përfshirë një automjet tip “Benz” me drejtues shtetasin A.L., 38 vjeç, dhe një tjetër automjet po tip “Benz”, i drejtuar nga shtetasi L.K., 36 vjeç.
Si pasojë e përplasjes së fortë, dy drejtuesit e automjeteve dhe katër pasagjerë që udhëtonin me ta kanë mbetur të lënduar. Të gjithë të plagosurit po marrin ndihmë mjekësore në spital. Burime nga vendngjarja bëjnë me dije se në një prej automjeteve udhëtonte një familje me tre persona, ku fëmija 8-vjeçar është nisur drejt Spitalit të Traumës në Tiranë për trajtim më të specializuar. Gjithashtu, një person tjetër i plagosur është transportuar drejt Spitalit të Traumës.
Identiteti i plotë i të aksidentuarve ende nuk është bërë publik. Shkaqet e këtij aksidenti mbeten ende të paqarta. Grupi hetimor ndodhet në vendngjarje dhe po punon për zbardhjen e plotë të rrethanave dhe përcaktimin e shkakut të kësaj përplasjeje.
