Shoferi i aksidentit tragjik te mbikalimi i TEG-ut, i ndjeri Klevis Ruçaj, nuk kishte kryer asnjë shkelje, në 5 të evidentuara, që ta çonte tek heqja e patentës, por ndëshkimet kanë qenë administrative me gjobë, për kundravajtje. Ndërsa ende ekspertiza po kryhen rreth ngjarjes, mbi të ka folur edhe shefi i trafikut të kryeqytetit, Taulant Gjoka, i cili shpejtësinë shumë të lartë e ka parë si shkak kryesor. Ruçaj në fakt kishte postuar disa herë video në median sociale Tik-Tok, ku shfaqej në timon me shpejtësi përtej çdo norme të qarkullimit rrugor. Përtej kësaj, ai kishte një vit që kishte marrë lejen e drejtimit dhe ishte ndëshkuar pesë herë nga Policia Rrugore, në një hark kohor prej vetëm pesë muajsh, nga shtatori deri në janar. Mbi këtë fakt, Gjoka parashtroi se gjithçka qëndron dhe se 20-vjeçari ishte ndëshkuar me masat administrative të parashikuara në ligj.
Por, në asnjë prej tyre nuk parashikohej pezullimi apo heqja e patentës. Ajo çfarë mbetet gjithsesi, është shqetësimi i radhës mes qytetarëve, për shoferët problematikë në akset rrugore dhe ngjarja e djeshme, e dëshmoi të gjithë këtë shqetësim.
Klevis Ruçaj, 20 vjeç, Erisilda Adedini, 22 vjeçe dhe Sikela Përroj, 23 vjeçe, ishin viktimat e aksidentit tragjik të ndodhur pasditen e 9 marsit, te mbikalimi i TEG-ut në Tiranë, në zonën e Saukut. Të plagosur mbetën edhe tre shtetas të tjerë, të cilëve mjeti tip “Audi” nën kontrollin e të riut, i erdhi nga lart dhe e goditi mbi kofano.
