Nuk është e pazakontë të dëgjosh për vende që përdorin programin spiun “Pegasus” të NSO Group për të vëzhguar publikun, por tani ka shqetësime se një qeveri po spiunon veten. Burime për “The New York Times” dhe “The Washington Post” pretendojnë se “Pegasus” është gjetur në telefonin e nënsekretarit të Meksikës për të drejtat e njeriut, Alejandro Encinas, një aleat i vjetër i Presidentit Andrés Manuel López Obrador, si dhe të paktën dy anëtarëve të zyrës së Encinas. Ndërsa nuk ka asnjë provë të fortë që tregon për një fajtor, kjo vjen pasi Encinas ka hetuar abuzime të dyshuara ushtarake të pushtetit që nga viti 2018, duke përfshirë zhdukjen famëkeqe të 43 studentëve në Iguala, më 2014.
Ekipi hulumtues i ‘Citizen Lab’, me bazë në Universitetin e Torontos, zbuloi “Pegasus” në një auditim të vitit 2022, sipas një burimi që flet për “The Post”. Telefoni i Encinas është komprometuar më shumë se një herë, thotë “The Times”, duke përfshirë vitin e kaluar kur ai drejtonte komisionin që mbulonte zhdukjet e Iguala. Ai fajësoi për tragjedi policinë, ushtrinë, zyrtarë të caktuar dhe trafikantët e drogës. Encinas me sa duket e informoi Obradorin për spiunimin këtë mars, por që atëherë ka heshtur.
Encinas, “Citizen Lab” dhe Ministria e Mbrojtjes meksikane, nuk kanë pranuar të komentojnë. NSO Group i thotë “The Times” në një deklaratë se shqyrton “të gjitha pretendimet e besueshme” për keqpërdorim dhe përfundon kontratat kur gjen probleme.
