Rusia akuzon Perëndimin përmes ambasadorit të saj në Beograd, për kërcënim me sanksione dytësore ndaj Serbisë. Ambasadori rus, Alexander Botsan-Kharchenko, në një intervistë për të përditshmen ruse “Vedomosti” tha se sanksionet janë në kontekstin e negociatave të vështira me Prishtinën.
“Perëndimi po e kërcënon Beogradin me sanksione dytësore, për refuzimin e tij që t’i bashkohet sanksioneve kundër Rusisë. BE-ja dhe ShBA po përpiqen të provojnë se Serbia, si një kandidat europian, duhet të rikonsiderojë politikën e saj të jashtme.
Serbëve u është thënë specifikisht se si ndëshkim atyre do t’u bllokohen negociatat e anëtarësimit, kufizojnë fondet e BE-së dhe ndalojnë regjimin e lëvizjes pa viza.
Ka edhe kërcënime rreth një reduktimi të mundshëm të investimeve perëndimore”, citohet ambasadori rus. Ai ka vënë në dukje se nëse masa të tilla do të vihen në zbatim, ato do ta dëmtojnë Serbinë që ka aktualisht një ritëm të mirë ekonomik.
m.b./dita
