Tekniku italian i Realit të Madridit doli në konferencën për shtyp i mërzitur nga eliminimi dhe pamundësia për të marrë një tjetër kupë me veshë të mëdhenj për spanjollët dhe për veten në palmaresin personal, që do e bënte një legjendë dhe pensiononte më së miri në të ardhmen e afërt. I vetëdijshëm për forcën e kundërshtarit, edhe pse para ndeshjes ishte optimist se do shkonin në finale, Carlo Ancelotti tha se nuk mendon që të largohet nga Reali.
“Të mendojmë për sezonin e ardhshëm, të mësojmë dhe të jemi më të mirë. Vitin e kaluar ne mundëm t’i mposhtim ata dhe të arrijmë në finale dhe këtë vit është radha e Manchester Cityt”, u shpreh ai për përfundimin e përplasjes mes dy skuadrave dhe që çoi anglezët në Stamboll. I pyetur për të ardhmen, ai tha: “Askush nuk dyshon, presidenti ka qenë mjaft i qartë 15 ditë më parë”. Mes palëve ka dakordësi për vazhdimësi, edhe pse Brazili e kërkon me çdo kusht për seleçaon.
