Përgatitjet intensive prej javësh dhe sjellja e më shumë se 100 tonë pajisjeve teknike në Stadiumin Qendror të Almaty-t nuk mjaftuan për të shmangur dështimin e datës së parë të koncertit të reperit amerikan Kanye West (Ye) në Kazakistan.
Ajo që duhej të ishte një nga ngjarjet më të mëdha muzikore të vitit në Azinë Qendrore u ndërpre në minutat e fundit për shkak të një kombinimi fatkeq faktorësh atmosferikë dhe logjistikë.
Sfera gjigante “u shfry” pas shkëputjes së energjisë
Skenografia komplekse e reperit përfshinte një strukturë sferike të fryrë — e cila simulonte një “planet” apo kupolë gjigante në mes të stadiumit. Megjithatë, mbajtja e kësaj strukture në këmbë u bë e pamundur kur qyteti i Almaty-t u godit nga një ndërprerje masive e energjisë elektrike si pasojë e një avarie në rrjetin rajonal.
Sikur të mos mjaftonte errësira, situata u përkeqësua nga stuhia me erëra të forte dhe reshje të dendura shiu. Pa energji për kompresorët, domi i skenës filloi të humbiste presionin, ndërsa organizatorët shprehën shqetësimin se sipërfaqja e lagur e skenës përbënte rrezik të drejtpërdrejtë për sigurinë fizike të artistit.
Reagimi i Ye dhe vendimi për shtyrjen
Mijëra adhurues që kishin mbushur shkallët e stadiumit duke pritur nën shi u njoftuan zyrtarisht nga ekipi organizativ vetëm pak momente para nisjes se spektakli nuk mund të zhvillohej.
Vetë Kanye West reagoi përmes një mesazhi në rrjetet sociale për të qetësuar publikun:
”Për njerëzit e Almaty-t: Për shkak të kushteve atmosferike, koncerti i sotëm shtyhet për nesër. Shëndeti dhe siguria janë prioriteti ynë kryesor. Shihemi nesër.”
Një rrugëtim i mbushur me pengesa
Përplasja e këtij koncerti kishte nisur që gjatë korrikut. Data e caktuar hyri në konflikt të drejtpërdrejtë me klubin e futbollit Kairat Almaty, ndeshjet e të cilit në kupat e Evropës u detyruan të zhvendoseshin në një stadium tjetër për t’i liruar vendin skenës gjigante të reperit.
Pavarësisht kësaj pengese të parë teknike, organizatorët kanë konfirmuar se koncerti është ridizajnuar për t’u zhvilluar të shtunën, më 15 gusht, me shpresën se kushtet meteorologjike dhe energjia elektrike do të jenë në favor të shfaqjes.
d.x. / dita
