Sot kisha menduar,
një tjetër muzikë,
por me Xhevdet Shehun,
do bëj një replikë!
A thua mor Xhodë,
nd’rrove istikamin,
kur s’je i sigurtë,
për Hamit Matjanin?!
“Kush duhet nderuar,
ai-a Asimi?!”
Pyet ti dhe sjell,
një dallgë zëmërimi!
“Kur letrën e Malos,
thua – të lexoni,
aman – se mos Malon,
ju ma keqkuptoni..!!”
“Se për diversantët,
ka shkruar kaq zi,
se në ato vite,
ka qënë djalë i ri…
…Ja ka dashur puna,
të shkonte në thekër,
se dhe Malua vetë,
po përndiqej egër…!!”
Jooo shoku Xhevdet,
Fol tamam si burrë,
Malo Kadareja,
s’është përndjekur kurrë!
Unë për Ismailin
kam folur kaq herë,
ishte shërbëtor,
si dhe shumë të tjerë!
Ishte shërbëtor,
i shokut Enver,
dhe këtë ofiq,
e kishte për nder!
Vetë Malua ka thënë,
një gjë të vërtetë:
“Lind si Enver Hoxha,
Një në 500 vjet!”
Malua që tani,
po bën disidentin,
veç për atë burrë,
e shkriu talentin!
Po ti-o Xhevdet,
keq më ke çuditur,
se ti s’ke akoma,
moshë për të lajthitur!
Historia jonë,
me kohë i ka ndarë,
cilët janë heronj,
dhe cilët tradhtarë!
E kemi Asimin,
kreun e lavdisë,
e Hamit Matjanin,
llum të historisë!
Ndaj dhe dua shumë,
pyetja që shtron ti,
të jetë tjesht lajthitje,
dhe jo ligësi!
