Për ish-zyrtarin e FSHF, Arben Dervishaj, u pushua akuza për ‘shpërdorim detyre’ dhe tashmë akuzohet për ‘falsifikim dokumentesh’, por pas përfundimit të seancës për mediat ka folur avokati i tij Arenc Myrtezani, i cili pretendon se hetimet janë devijuar dhe se faturat për të cilat klienti i tij ka nënshkruar janë të falsifikuara dhe kjo është e provuar.
“Ne kërkuam papërdorshmërinë e këtyre faturave, që kanë dalë të falsifikuara. Me e çuditshmja ishte se për këto fatura të falsifikuara u shtua një akuzë për Arben Dervishin, ndërkohë që për pandehurin që unë mbroj, nuk u morën parasysh. Janë të provuara që këto fatura janë të falsifikuara me imitim, ose të vendosura mbi xham. Nuk gjendet asnjë faturë e shkruar dhe nënshkruar prej të pandehurit që unë mbroj. Unë mendoj se Prokuroria, lidhur me një akuzë për mashtrim, lidhur me pagesat që janë për firmën italiane që është fituese e koncesionit, ka devijuar hetimet. Sepse në bindjen time, rezulton se ka qenë detyrw jo vetëm e klientit tim, por edhe të tjerëve që të bënin këtë detyrë. Ka qenë detyrë e administratorit të ri dhe ministrit të ri që ka zëvendësuar Lefter Kokën”, tha ndër të tjera avokati.
