Në SHBA dhe Kanada, debati rreth objekteve fluturuese misterioze vijon. Shumë nga pyetjet në lidhje me balonat mbeten pa përgjigje.
Qeveria amerikane, kundërzbulimi, agjencitë e sigurisë refuzuan të hyjnë në detaje për çdo përfshirje të profesorit kinez Wu Ze në breshërinë e fundit të balonave mbi SHBA dhe Kanada.
Wu është themelues dhe/ose aksioner në tre nga gjashtë kompanitë kineze të sanksionuara nga qeveria amerikane për balonat e spiunazhit.
New York Times zbulon se ky profesor i veçantë në Universitetin Beihang në Pekin konsiderohet autoriteti i epërm në botë për balonat. Për më shumë se 20 vjet, Wu ka eksperimentuar dhe hulumtuar mjete fluturuese si balonat në lartësi të mëdha.
Në vitin 2019, Wu Ze dhe ekipi i tij i studiuesve njoftuan se kishin arritur të përsosin një balonë të aftë për të fluturuar në një lartësi prej 18,300 metrash. Profesor Wu e lëshoi këtë balonë të veçantë të shkojë nëpër botë, sigurisht edhe në hapësirën ajrore të SHBA.
Wu Ze deklaroi në atë kohë, se ndihej i gëzuar pa masë dhe se balona prototip “Cloud Chaser” ishtw një moment historik në zhvillimin e teknologjisë përkatëse. Sipas tij, përdorimi i tyre, duhet të bëhej i përgjithshëm për qëllime të parandalimit dhe regjistrimit të fatkeqësive natyrore dhe monitorimit të ndotjes atmosferike.
Por Kina, në të vërtetë, po i përdor këto balona për qëllime politike dhe ushtarake, sipas SHBA. Në raportin e New York Times thuhet se agjencitë amerikane po hetojnë profesorin Wu Ze dhe aktivitetin e tij, duke e parë atë si njeriun kyç për programin e balonave në emër të regjimit kinez.
Profesor Wu është 66 vjeç dhe gjatë gjithë karrierës së tij deri më sot ka qenë i përfshirë në projektimin e avionëve luftarakë. Ai ka qenë i angazhuar në zhvillimin e materialeve të zbulimit jo radar. Për kontributin e tij në shkencë dhe teknologji, Wu Ze është nderuar vazhdimisht me çmime të ndryshme.
m.b./dita
