Tensionohet situata mes banorëve të Bërxullës dhe forcave të rendit. Përshkallëzohet protesta e nisur prej më shumë se pesë muajsh, për shkak të kuotave të shpronësimeve për tokat ku kalon rruga e re Thumanë-Kashar. Banorët e Bërxullës kanë dalë sërish në protestë për shkak se nuk janë dakord me zhvlerësimin që u bëhet pronave të tyre të cilat preken nga ndërtimi i aksit nga kompania “Gener 2”. Një banor ka paralajmëruar se nëse nuk ka një dialog do të marrin masa ekstreme.
“Në Bërxullë nuk ka punime, nuk do bëhen për aq kohë sa s’ka marrëveshje me ne. Firma është në ajër, po shteti? Çdo 6 muaj që i ndërrojnë drejtorët e hipotekës që mos japin llogari. Llogari i kërkohet vetëm popullit. Nuk jepet prona siç duan këto, pronat i kemi prej vitesh të trashëguara. Jemi në mëshirë të fatit pa asnjë lloj mbrojtje. Do fillojmë të marrim masa ekstreme. Të nisin dialogun ose do marrim masa ekstreme. Ne kështu nuk mund të vazhdojmë. Ata janë në gjumë, i thoshin një tjetri ti fle gjumë po tani kanë filluar të flenë dhe vetë. Ne nuk duam të shkojmë në akte dhune dhe vandale”, tha banori i revoltuar. Kurse një grua e ulur këmbëkryq në mes të rrugës, u shpreh se ishte e përgatitur edhe për flijim, sepse kishte marrë shkrepëse dhe benzinë me vete.
“Kemi 6 muaj që protestojmë. Këta janë më pushtetarët më të ndyrë që kemi pasur ndonjëherë. Edhe firma Gener2 po bën lojërat më të mëdha se e ka tagrin nga shteti. Ne nuk dorëzohemi, pronat, shtëpitë dhe jetën se japim për këta. Unë jam invalidë e plotë dhe unë kërkoj të gjitha të drejtat që meritoj si invalide. Shteti për mua nuk bën asgjë, më lë në rrugë. Pse nuk vijnë të flasin me banorët? As Bashki, as qeveri asgjë. Vetëm hajdutë ka këtu, ngrihu hoxhë të ulet prifti. Populli nuk ka bukë të hajë sepse shteti na ka çuar në këtë pikë? Edhe unë benzinën me vete e kam këtu e kam ta përdor. Edhe shkrepësen këtu e kam edhe shihni ju. Jam nënë 63-vjeçare, si heroinë, si Shote Galica”, tha banorja.
