Prokuroria e Tiranës kërko shpalljen fajtor dhe dënimin nga Gjykata me 12 vite burg, për të pandehurin Kristjan Gjini dhe vetëm 3 vite burgim për bashkëpunëtorin e tij të dyshuar, të arratisurin Fatjon Murati, të cilët kishin ngritur një bazë armatimesh në Tiranë në korrik të vitit të kaluar. Kristjan Gjini ka pranuar se bazën e armëve e kishte ngritur ai dhe Prokuroria kërkon 12 vite burg, duke shfajësuar mikun e tij, të cilit iu gjet gjurmë gishti në vendngjarje.
Ndërkohë që ndaj Fatjon Muratit rëndon vetëm akuza për armëmbajtje pa leje, pasi këtij të fundit iu gjet gjurma në kutinë e një pistolete të sekuestruar më 13 korrik, ditën kur u zbulua edhe baza e armatimeve në Tiranë, që i përkiste Kristjan Gjinit. Por, Fatjon Murati është në arrati, pasi ka thyer masën ‘arrest shtëpie’, e lehtësuar në rrethana të dyshimta nga gjykata, duke përfituar të arratisej. Murati rezulton të ketë ikur nga Shqipëria, ditën që ndaj lokalit të tij në “Don Bosko” është qëlluar me breshëri, ku humbi jetën edhe banakierja Mimoza Paja dhe 6 persona mbetën të plagosur. Shënjestër ishte Murati dhbe familjarët e tij që ndodheshin në lokal në ato momente. I kërkuari kaloi nga Morina drejt Prishtinës disa orë para sulmit, i ndihmuar nga miqtë e tij Endrit Dokle dhe Gentian Reçi, me të njëjtët me të cilët u kap më 8 tetor 2022 në Tiranë, teksa qarkullonin me makinë të blinduar. Murati besohet se është arratisur më tej drejt Turqisë. Murati është dyshuar edhe si pjesëmarrës në atentatin e bujshëm dhe masakrën e Fushë-Krujës, ku u vranë 3 persona, mes tyre edhe Brilant Martinaj, kushëriri i parë i biznesmenit të zhdukur, edhe ky i shumëkërkuar për krime, Ervis Martinaj. Ndaj besohet se atentati në “Don Bosko” është bërë nga grupi i ‘mbretit të kumarit’. Murati ka deklaruar se nuk ka lidhje me arsenalin e armëve dhe as me vrasjen e trefishtë, duke dhënë alibi. Kurse Kristjan Gjini kishte marrë në emër të tij 2 ambiente me qira në kompleksit rezidencial ‘Fusha’ në kryeqytetet, në njërën prej të cilave jetonte Franceska Kolgjegja, bashkëpunëtore e tyre. Gjatë kontrollit në këto 2 banesa u gjetën 7 armë zjarri, 4 silenciatorë, municion luftarak, krehra, lëndë e dyshuar narkotike, 2 radio si ato të Policisë, dorashka, 7 maska, një thikë, dokumente të dyshuara të falsifikuara, targa të huaja dhe 2 automjete.
