Rregullatori më i lartë i mbrojtjes së të dhënave në BE ka gjobitur TikTok me 530 milionë euro për shkak të shqetësimeve se si mbron të dhënat personale të përdoruesve.
Rregullatori gjithashtu urdhëroi platformën të pezullojë transferimet e të dhënave në Kinë nëse përpunimi i të dhënave nuk përputhet me ligjin e BE-së brenda gjashtë muajve, raporton Reuters.
Komisioni Irlandez për Mbrojtjen e të Dhënave (DPC) tha se TikTok, i cili është në pronësi të ByteDance të Kinës, nuk mund të demonstrojë se të dhënat personale të përdoruesve të BE-së mbrohen në mënyrë adekuate në përputhje me ligjin e BE-së.
TikTok njoftoi se do ta apelonte vendimin, duke argumentuar se përdori kornizën legjislative të BE-së, në veçanti klauzolat standarde kontraktuale, për të mundësuar akses të kontrolluar dhe të kufizuar në distancë.
Ai shtoi gjithashtu se vendimi nuk merr parasysh masat e mbrojtjes së të dhënave të futura në vitin 2023, të cilat monitorojnë në mënyrë të pavarur aksesin në distancë dhe sigurojnë që të dhënat e përdoruesve të BE-së të ruhen në qendra të dedikuara të të dhënave në Evropë dhe Shtetet e Bashkuara.
TikTok deklaroi se nuk kishte marrë një kërkesë nga autoritetet kineze për të dhënat e përdoruesve të BE-së, dhe as nuk u kishte ofruar atyre ndonjë të dhënë.
i.b./dita
