Në një intervistë në News 24, kryetari i Bashkisë së Tiranës, Erion Veliaj u pyet edhe në lidhje me akuzat që mbështetësja e Berishës, Evi Kokalari, ka bërë ditët e fundit kundër Belind Këlliçit, për të cilin është shprehur se ka falsifikuar formularin e aplikimit të Universitetit në SHBA, pasi nuk e ka përfunduar shkollën e mesme ‘Harry Fultz’.
Falsifikime të tilla janë krime federale në SHBA.
Lidhur me këtë, Veliaj tha se kjo është diçka që nuk i takon atij, por institucioneve, dhe se ai është I fokusuar te punët e qytetit.
“Së pari, të gjithë ata që garojnë i konsideroj jo kundërshtarë, janë të ftuar në këtë sofër të madhe të Tiranës për të ballafaquar idetë, por ama jo për të bllokuar punët.
Së dyti, unë nuk jam drejtori apo drejtoresha e “Harry Fultz”-it. Duhet të pyesni drejtorët e shkollave të mesme kush shkon në shkollë, kush lë shkollën, kush ka diplomë, kush nuk ka diplomë. Këtu në Tiranë i keni, pyesni – siç pyesni për mua për çdo gjë – pyesni edhe shkollat, ose kandidatët çfarë shkollash kanë bërë.
E treta, që është më e rëndësishme, unë nuk jam as Ilirjan Celibashi i KQZ-së, as merrem me formularët e dekriminalizimit. Kush gënjen nëpër formularë, duhet të pyetet respektivisht çdo institucion”, tha Veliaj.
Kreu i Bashkisë u shpreh se mbetet i fokusuar 100% tek punët e qytetit.
“I vetmi interes ku jam 100% i fokusuar është si i ecin punët Tiranës. Tirana ka parë kllounë që hyjnë e dalin pa fund. Po ajo që ka mbetur është puna, janë skuadrat që e çojnë qytetin përpara dhe është dëshira për modernizimin, për ta bërë sa më perëndimor Tiranën dhe për të mos humbur më kohë.
Një parti e lodhur e ca liderëve të rrënuar moralisht, s’ka çfarë t’i japë më Shqipërisë. Unë besoj se Tirana duhet të ecë shpejt për të kapur boll kohë të humbur këto vite”, tha Veliaj.
o.j/dita