Presidenti amerikan Joe Biden dhe kryeministri izraelit Benyamin Netanyahu kanë mbajtur një konferencë për shtyp pas vizitës së kreut të Shtëpisë së Bardhë në Izrael.
Siç shkruajnë mediat e huaja, Netanyahu ka vlerësuar vizitën e Biden, i cili ndërroi edhe axhendën e tij për të vizituar sa më shpejt Izraelin pas sulmit të një spitali në Gaza.
Kreu i qeverisë izraelite i ka cilësuar militantët e Hamasit si “nazistët e rinj”, duke i krahasuar sulmet ndaj Izraelit sot me fatkeqësinë e holokaustit në Gjermaninë naziste.
Biden nga ana tjetër ka deklaruar për mediat se SHBA do sigurohet që Izraeli të ketë gjithçka që i nevojitet për të siguruar mbrojtjen e vendit nga sulmet armike.
Ai u shpreh se Hamasi nuk përfaqëson gjithë njerëzit palestinezë, ndërsa shtoi se është thellësisht i prekur dhe i zemëruar me sulmin e fundit në Gaza, ku u shkatërrua një spital me qindra pacientë.
Megjithatë ai iu drejtua kryeministrit izraelit Netanyahu duke i thënë se bazuar në atë që ka dëshmuar dhe ka parë, Izraeli nuk është përgjegjës për sulmin.
Çfarë dimë deri më tani?
Konflikti filloi të shtunën e kaluar kur Hamasi nisi Operacionin Al-Aksa Flood kundër Izraelit, një sulm i papritur i shumëfishtë duke përfshirë një breshëri lëshimesh raketash dhe infiltrimesh në Izrael nëpërmjet tokës, detit dhe ajrit. Hamasi tha se operacioni ishte në hakmarrje për sulmin ndaj Xhamisë Al-Aksa në Jerusalemin Lindor të pushtuar dhe dhunës në rritje të kolonëve izraelitë kundër palestinezëve.
Ushtria izraelite më pas nisi operacionin Shpatat e Hekurt kundër objektivave të Hamasit brenda Rripit të Gazës. Përgjigja e Izraelit është shtrirë në ndërprerjen e furnizimit me ujë dhe energji elektrike në Gaza, duke përkeqësuar më tej kushtet e jetesës në një zonë që është përfshirë nga një rrethim gjymtues që nga viti 2007. Mbi 3,500 njerëz janë vrarë që nga shpërthimi i konfliktit më 7 tetor, duke përfshirë 2,215 palestinezë dhe 1,400 izraelitë.
j.l./ dita
