Është arrestuar në Greqi i shumëkërkuari Kujtim Demiri, i dënuar nga ish-Gjykata e Krimeve të Rënda në Shqipëri, me 14 vite burg në mungesë, për trafik fëmijësh. Zyra e kërkimit pranë Policisë së Tiranës, e cila në bashkëpunim me Europol arritën që të gjurmojnë në Athinë 57-vjeçarin, konfirmoi se kanë kryer ndalimin me qëllime ekstradimi. Demiri akuzohet për trafikim të të miturve dhe në përfundim të procedurave pritet që të ekstradohet në Shqipëri për t’u përballur me akuzat e ngritura ndaj tij. Më herët, Demiri bleu fëmijën për 10 mijë lekë të reja dhe e përdori për disa vite me radhë që të lypte nëpër rrugët e Greqisë. Kujtim Demiri u shpall fajtor dhe u dënua me 14 vjet burg, ndërsa ishin vetë prindërit e të miturit që treguan se bëhej fjalë për një pazar që kishin bërë me këtë person, për ta nisur djalin drejt Greqisë dhe që të punonte t’u sillte të ardhura edhe atyre.
Blinte fëmijë me 10 mijë lekë nga prindërit dhe i trafikonte si lypësa, kapet në Greqi i dënuari me 14 vite burg
