Teksa ndodhet në pritje të ekstradimit të tij drejt Turqisë, sipas një vendimi të Apelit të Durrësit, bosi turk i kriptomonedhës së falimentuar “Thodex”, ka bërë rekurs në Gjykatën e Lartë.
Ai këmbëngul se nëse dërgohet në vendin e tij, i rrezikohet jeta nga shteti. Rekursi konfirmohet nga avokati i tij, Faruk Fatih Ozer. Nuk dihet nëse ekstradimi do kryhet në këto rrethana, apo do pritet për vendimin e shkallës së tretë.
Pasi u shty disa herë seanca, Apeli i Durrësit la në fuqi vendimin e Gjykatës së Shkallës së Parë për ekstradimin e tij. Ai akuzohet për mashtrim me kriptomonedhat ndaj shumë shtetasve turq, me një dëm ekonomik që është vlerësuar deri në 2 miliardë dollarë, sipas autoriteteve turke.
Vetë Ozer e ka mohuar, duke pranuar se bëhet fjalë për jo më shumë se 20 milionë euro, nga të cilat pjesën më të madhe e ka shlyer dhe të tjerat i ka në proces, – thotë avokati i tij.
Faruk Ozer i arratisur prej muajit prill të vitit 2021, akuzohet në Turqi se në bashkëpunim me persona të tjerë, ngriti një skemë ku janë përfshirë rreth 400 mijë persona që investuan.
Platforma e tij, tashmë është mbyllur dhe autoritetet turke i bllokuan llogaritë bankare të kompanisë “Thodex”. Sipas mediave turke, në momentin që është arratisur nga vendi, Faruk Ozer kishte me vete edhe një server, ku mbante 108 milionë dollarë në formë kriptomonedhash.
Në Turqi janë arrestuar disa bashkëpunëtorë të 28-vjeçarit, me akuzën e mashtrimit.
SHISH dhe Forcat Operacionale ndoqën për 5 javë Faruk Ozer dhe dy shqiptarë që e shoqëronin. Jetesa e tij shtrihej me Elbasanit dhe një resorti luksoz në Palasë të Vlorës.
Për disa javë, Ozer ka shijuar plazhin e rivierës shqiptare gjatë vitit 2022, duke ndryshuar edhe pamje për të mos u njohur, me flokë të qethura dhe me mjekër.
Ai është identifikuar nga gjurmët e gishtërinjve që linte teksa pushonte në ambientet e rezortit në Palasë.
Bashkë me 28-vjeçarin u arrestua edhe Edevaldo Haxhiu, nipi i presidentit të Federatës Shqiptare të Futbollit, Armand Duka, që akuzohet se e ndihmonte të shumëkërkuarin që t’i fshihej autoriteteve. Bosi i kriptomonedhave fshihej prej 4 muajsh në një banesë me qira në Elbasan, jo në emër të tij, të cilën dyshohet se ia kishte siguruar Edevaldo Haxhiu.
