Prokurori i çështjes kundër ish- presidentit amerikan Donald Trump, ka deklaruar për mediat, pas përfundimit të seancës së sotme se Trump falsifikoi në mënyrë të përsëritur të dhënat e biznesit të Nju Jorkut.
Alvin Bragg deklaroi se nuk mund të lejohet që bizneset e Nju Jorkut të manipulojnë të dhënat e tyre për të mbuluar sjelljen kriminale.
Përmes një deklarate për shtyp, Prokurori i Qarkut të Manhatanit Alvin Bragg është shprehur se rasti ndaj Trump ka të bëjë me 34 deklarata të rreme të bëra për të mbuluar krime të tjera.
Duke paraqitur rastin kundër Trump, ai tha se ish-presidenti “bënte vazhdimisht deklarata të rreme për të dhënat e biznesit të Nju Jorkut“, si dhe kishte ndikuar që edhe të tjerët të bënin deklarata të rreme.
Bragg tha se Trump pretendoi se ai kishte paguar ish-avokatin e tij Michael Cohen për shërbimet ligjore në vitin 2017, por kjo “thjesht nuk ishte e vërtetë”.
“Për nëntë muaj rresht i pandehuri mbante në dorë dokumente që përmbanin këtë gënjeshtër kryesore dhe ai personalisht nënshkroi çeqe duke paguar Michael Cohen për secilin prej këtyre nëntë muajve.
Juria e madhe zbuloi se kishte 34 dokumente me këtë deklaratë kritike të rreme.”
Duke mbrojtur çështjen e tij kundër Trump, ai përsëriti disa herë se të dhënat e sakta të biznesit ishin të rëndësishme dhe “aq më e rëndësishme kur bëhej fjalë për Manhattan – qendra financiare e botës”. Duke vënë në dukje përvojën 24 vjeçare, Bragg këmbënguli se puna e tij ishte një hetim “të plotë dhe rigoroz”.
m.b./dita
