Dori Xhima
Në një moshë kur shumica e të rinjve po përfundojnë studimet universitare ose po hedhin hapat e parë në tregun e punës, 25-vjeçari britanik James Dacombe ka hyrë zyrtarisht në listën e rrallë të miliarderëve më të rinj në botë.
Pas raundit të fundit të investimeve startup-i i tij i çipave për Inteligjencën Artificiale, Olix, arriti një vlerësim prej 3.3 miliardë dollarësh.
I themeluar vetëm dy vite më parë në Londër (fillimisht nën emrin Flux), startup-i Olix arriti të thithë 312 milionë dollarë investime në raundin e fundit financues. Përmes këtij raundi, vlera e kompanisë u trefishua krahasuar me fillimin e vitit.
Midis investitorëve kryesorë që kanë mbështetur vizionin e Dacombe renditen emra si gjiganti i mikroprocesorëve Arm,
Fondi Hudson River Trading,
bashkëthemeluesi i Netflix, Reed Hastings dhe Fondi shtetëror britanik për IA (Sovereign AI Fund).
Olix po zhvillon çipa të specializuar që përdorin teknologjinë optike (përcjelljen e të dhënave përmes dritës) për të rritur shpejtësinë dhe eficiencën energjetike gjatë procesimit të modeleve të mëdha të IA-së. Kjo përpjekje e drejtpërdrejtë sfidon dominimin e Nvidia-s në infrastrukturën globale të inteligjencës artificiale.
”Koha kur një çip i vetëm i përgjithshëm mund të përballonte çdo detyrë të inteligjencës artificiale ka përfunduar. Industria po shkon drejt specializimit,” ka deklaruar Dacombe për Financial Times.
Një rrugëtim jo konvencional
Rruga e Dacombe drejt suksesit nuk ndoqi asnjë prej hapave tradicionalë arsimorë apo korporativë. I rritur në North Yorkshire të Anglisë, ai nisi të krijonte uebsajte dhe aplikacione që në moshën 13-vjeçare.
Në moshën 17-vjeçare vendosi të braktiste shkollën e mesme për t’iu përkushtuar plotësisht sipërmarrjes së tij të parë, CoMind, e cila zhvillon teknologji jo-pushtuese për monitorimin e aktivitetit cerebral.
Përzgjedhja e tij në programin prestigjioz të miliarderit Peter Thiel (Thiel Fellowship) i dha mbështetjen financiare dhe logjistike për të vijuar rrugën jashtë auditoreve universitare.
Sot, Dacombe zotëron rreth 30% deri në 38.6% të aksioneve në Olix, si dhe vazhdon të udhëheqë kompaninë e tij të parë CoMind (ku zotëron rreth 12%), duke e çuar pasurinë e tij neto letrare mbi kufirin e 1 miliard dollarëve.
Sfidat për 25-vjeçarin nuk kanë përfunduar me vlerësimin në letra. Olix planifikon të përmbyllë dizajnimin përfundimtar të çipit (tape-out) brenda këtij viti, me synimin për të nisur dërgesat e para komerciale për klientët në vitin 2027.
DITA
