Nga Orgen Peci
Vendimi i SPAK për të vendosur në arrest shtëpie dhe për të pezulluar nga detyra drejtoreshën e Shërbimit Informativ Shtetëror, Vlora Hyseni, është një episod penal i jashtëzakonshëm. Për nga funksioni që ajo mbante, bëhet fjalë për një nga çështjet më të ndjeshme që kanë prekur ndonjëherë strukturat e sigurisë kombëtare shqiptare.
SPAK ka bërë të ditur se Hyseni po hetohet për dy vepra penale: “Përkrahja e autorit të krimit” sipas nenit 320/2 të Kodit Penal dhe “Zbulimi i akteve ose të dhënave sekrete” sipas nenit 295/a/1. Për një drejtues të SHISH-it, këto janë ndër akuzat më të rënda që mund të ngrihen, sepse prekin vetë thelbin e institucionit, ruajtjen e informacionit të klasifikuar dhe mbrojtjen e interesave të sigurisë kombëtare.
Akuza e parë, ajo e përkrahjes së autorit të krimit, është e rëndë edhe në aspektin politik. Por nuk mjafton njohja personale. Prokuroria duhet të provojë veprime konkrete që kanë favorizuar autorin e dyshuar të krimit. Gjithsesi, fakti që gjykata ka pranuar kërkesën për arrest shtëpie dhe pezullim nga detyra tregon se prokuroria ka paraqitur indicie të mjaftueshme për të justifikuar vazhdimin e hetimit me masa kufizuese.
Gjatë seancës së zhvilluar me dyer të mbyllura në Gjykatën e Posaçme, Hyseni, e shoqëruar nga avokati, ka kundërshtuar akuzat e ngritura ndaj saj dhe ka kërkuar që telefoni i sekuestruar të ekzaminohet nga agjenci partnere jashtë Shqipërisë.
Sipas informacioneve të bëra publike nga mediat, seanca ka zgjatur rreth një orë e gjysmë dhe është zhvilluar nën masa të forta konfidencialiteti për shkak të natyrës së çështjes, e cila lidhet me funksionin që Hyseni ka mbajtur në krye të shërbimit inteligjent shqiptar.
Burime jozyrtare pranë SPAK kanë bërë me dije se gjatë seancës prokurorët kanë vijuar paraqitjen e të dhënave dhe fakteve që dyshohet se mbështesin akuzat, ndërsa një pjesë e konsiderueshme e materialit mbetet e mbuluar nga sekreti hetimor dhe ai shtetëror.
Mësohet se Hyseni ka mohuar kategorikisht akuzat dhe ka deklaruar se nga ana e saj nuk është nxjerrë apo shpërndarë asnjë dokument i klasifikuar gjatë kohës që ka ushtruar detyrën si drejtoreshë e SHISH. Po ashtu, ajo ka kërkuar që ekspertimi i telefonit të saj të mos kryhet në Shqipëri, por nga agjenci partnere ndërkombëtare.
Arsyet e këtij kërkimi nuk janë bërë publike dhe mbeten të paqarta, ndërsa në qarqet e drejtësisë vërehet se SPAK disponon laboratorin e vet të specializuar për ekzaminimin e pajisjeve elektronike dhe provave digjitale. Për këtë arsye, kërkesa e ish-drejtoreshës së SHISH ka ngjallur interes dhe pikëpyetje mbi argumentet që pritet të paraqiten në vijim nga mbrojtja.
Pas përfundimit të seancës, Vlora Hyseni është larguar nga ambientet e SPAK pa bërë asnjë deklaratë për mediat.
Ndërkohë, Prokuroria e Posaçme ka rikujtuar se për shkak të natyrës së hetimit dhe vendimit të gjykatës, ndalohet publikimi i të dhënave që lidhen me përmbajtjen e seancës, ndërsa hetimet vijojnë mbi dyshimet që kanë çuar në vendosjen e masës së sigurisë ndaj ish-kreut të SHISH.
DITA
