Kryeministri Edi Rama udhëtoi këtë të hënë drejt Italisë ku do të marrë pjesë në ceremoninë e inaugurimit të Konsullatës së Nderit të Republikës së Shqipërisë në Napoli. Gjatë kësaj vizite, ai do të vizitojë edhe Katedrën e Gjuhës Shqipe në Universitetin “L’Orientale” si dhe Universitetin “Parthenope”. S bashku me ministren e Arsimit, Mirela Kumbaron, do të zhvillojnë dhe një takim me rektorët e universiteteve të Napolit.
Por një incident i paprecedentë raportohet të ketë ndodhur në fluturimin e linjës Tiranë-Napoli.
Sipas pasagjerëve dëshmitarë që kanë dërguar video në media kryeministri Edi Rama është përfshirë në një përplasje verbale dhe fizike me një të ri shqiptar. Sipas dëshmive, gjithçka ka nisur kur i riu e ka akuzuar Kryeministrin se po e shkatërron vendin, duke e nxitur të mos kthehej më në Shqipëri.
Situata pretendohet se ka agravuar kur Rama e ka kërcënuar qytetarin me fjalët “Të zhduk” dhe e ka kapur për qafe. Një video amatore e filmuar nga dritarja e avionit mbështet këto pretendime, duke treguar Kryeministrin teksa zbret shkallët duke e mbajtur të riun prej qafe, përpara se ta dorëzojë te policia italiane që priste në pistë, me sa duket e njoftuar gjatë uljes së avionit.
Motivi zyrtar i kërkuar për shoqërimin në polici, sipas raportimeve, ka qenë pretendimi i Kryeministrit se i riu po e fotografonte pa leje, ndërkohë që institucionet nuk kanë dhënë ende një reagim zyrtar për ngjarjen.
Dëshmitë ende të pakonfirmuara thonë që edhe te shkallët e avionit ka vijuar përplasja. “Të q***a robt”, thuhet se i ka thënë i riu Ramës ndërsa ky i mbante dorën në qafë. Siç shihet dhe në video kryeministri ka përfunduar duke e dorëzuar vetë këtë shtetas në duart e karabinierëve.
Për incidentin nuk ka asnjë deklaratë zyrtare të konfirmuar deri tani.
