Belinda Balluku është tashmë e pandehur në dy çështje të ndara që lidhen me procedurat e prokurimit publik. Ajo akuzohet për paracaktimin e dy tenderave me vlerë të lartë, përkatësisht tunelin e Llogarasë dhe një segment të Unazës së Madhe të Tiranës, me një total mbi 210 milionë euro.
Paralelisht, ekziston një kallëzim i dytë që e lidh atë dhe bashkëpunëtorin e saj të afërt, Ceno Klosin, me një skemë të dyshuar të një grupi të strukturuar kriminal që dyshohet se ka favorizuar kompani private të lidhura me ta në tenderat e institucioneve që drejtonin.
Hetimet janë në vijim dhe asnjë nga akuzat nuk është provuar ende nga gjykata.
Por dyshohet se Ceno Klosi u fut nga Rama në listat e deputetëve për ti krijuar imunitet për shkak të hetimeve që ai kishte informacion që kishin nisur.
Prokuroria e Posaçme e ka regjistruar procedimin e ri penal bazuar në një kallëzim të kryer nga Adriana Kalaja, e cila pretendon se ministrja Balluku dhe ish-zëvendësi i saj, Ceno Klosi kanë përfituar tenderat e institucionit që drejtonin.
Regjistrimi i procedimit penal u bë me dije përmes një shkrese të rrjedhur në media, e nënshkruar nga prokurori i SPAK, Adnan Xholi dhe drejtuar Adriana Kalasë në cilësinë e kallëzueses. Koordinatorja për mediat e SPAK konfirmoi autenticitetin e dokumentit, por nuk bëri me dije më shumë të dhëna për shkak të sekretit hetimor.
Në shkresën e SPAK sqarohet se, bazuar në kallëzimin e kryer nga Kalaja kundër Belinda Ballukut, Ceno Klosit dhe personave të tjerë, është regjistruar procedimi penal nr.95 i vitit 2025. Po ashtu bëhet me dije se një material kallëzues shtesë është protokolluar më 16 shtator dhe është administruar në kuadër të këtij hetimi. SPAK konstaton se procedimi penal është në fazën e hetimeve paraprake.
Pas kryerjes së kallëzimit penal shtatë muaj më parë, denoncuesja Adriana Kalaja deklaroi për mediat se kallëzimi lidhet me një skemë të dyshuar të një grupi të strukturuar kriminal, nën drejtimin e Ballukut dhe Ceno Klosit, të cilat përmes kompanive të tyre private akuzohen se kanë zhvatur fondet publike, pasi rezultojnë përfituesit kryesorë të tenderave që jepnin insitucionet që të kallëzuarit drejtonin.
Gjykata e Posaçme e Shkallës së Parë për Korrupsionin dhe Krimin e Organizuar vendosi më 22 nëntor të vazhdojë zbatimin e masave të sigurimit personal të caktuara ndaj zëvendëskryeministres Belinda Balluku, për pezullim nga detyra dhe ndalim të daljes jashtë shtetit të saj.
Të pandehur për këto çështje janë edhe ish-drejtori i Autoritetit Rrugor Shqiptar, Evis Berberi; drejtori aktual i këtij institucioni, Gentian Gjyli dhe Erald Elezi, me funksion administrator i Koorporatës Elektroenergjitike Shqiptare. Këta dy të fundit janë vendosur në arrest shtëpiak, ndërsa Berberi është arrestuar më parë për abuzime të tjera me fondet publike.
