DASH: Kurtit i kërkuam privatisht edhe publikisht shtyrje të afatit për targa

Departamenti Amerikan i Shtetit përmes një konference direkte nga Washingtoni të zëdhënësit Ned Price, ka lëshuar edhe një deklaratë rreth vendimit të fundit të Qeverisë së Kosovës për targat.

Price ka thënë se SHBA kërkon shtyrje të plotë të vendimit për targat, e jo pjessshëm.

“Ne kemi qenë të qartë si në publik ashtu dhe privatisht se bashkësia ndërkombëtare, përfshirë SHBA-në, kërkojmë shtyrje të plotë në aspektin e implementimit”.

“Ne nuk kërkojmë implementim të pjesshëm apo edhe në faza. Komuniteti ndërkombëtar i ka kërkuar Qeverisë së Kosovës, shtyrje të plotë”, u shpreh Price.

Ndërkaq, zëdhënësi i Qeverisë, Përparim Kryeziu, të hënën ka thënë se “me vendimin për sekuecimin në kohë dhe shkallëzimin e sanksioneve për zbatimin e vendimit pararendës për targat ilegale, Qeveria ka vepruar në mënyrë të përgjegjshme në raport me obligime për respektim të sundimit të ligjit dhe në të njëjtën kohë në raport me përkushtimin për paqe dhe siguri”.

Sipas Qeverisë, vendimi nis së zbatuari më 1 nëntor në tri faza. E para është qortimi i shoferëve që vozisin makina me targa të tilla; E dyta është gjobë prej 150 eurosh për ata shoferë dhe e  treta janë targat provuese.

Zbatimi i këtij plani do të përfundojë më 21 prill, prej kur në qarkullim do të lejohen vetëm makina me targa RKS, apo Republika e Kosovës.

a.m/dita