Komisioni Ad Hoc i ngritur pranë Kryeministrisë ka publikuar renditjen përfundimtare të kandidatëve për pozicionin e Kryetarit dhe anëtarëve të Komisionit të Prokurimit Publik (KPP), institucionit që shqyrton ankesat për tenderët publikë në Shqipëri.
Sipas listës së publikuar, për postin e Kryetarit renditen:
* Ismail Shehu – 74 pikë
* Enea Hoti – 74 pikë
* Ertil Sula – 57.3 pikë
* Bledar Zeneli – 49 pikë
Ndërkohë, për pozicionet e anëtarëve, kandidati më i vlerësuar është Fiorent Zguro me 82 pikë, i ndjekur nga Ervin Simo me 73 pikë dhe Enkeleon Topulli me 71.6 pikë. Lista vijon me emra të tjerë juristësh dhe ekonomistësh të vlerësuar nga Komisioni Ad Hoc.
Megjithatë, publikimi i renditjes ka ngritur pikëpyetje mbi mënyrën se si po funksionon sistemi i meritokracisë në përzgjedhjen e drejtuesve të institucioneve të pavarura, shkruan Vox News.
Procedura ligjore parashikon që kandidatët të renditen sipas pikëve të marra, ndërsa lista i dërgohet Këshillit të Ministrave dhe më pas Kuvendit për vijimin e procedurës së emërimit.
Nga ana tjetër, në opinionin publik kanë nisur të qarkullojnë pretendime se mes kandidatëve të renditur në krye ka persona që konsiderohen të afërt me mazhorancën ose me lidhje të forta politike. Gjithashtu, është vënë re se një numër i konsiderueshëm kandidatësh thuhet se kanë origjinë nga Dibra.
Konkretisht kandidati për kryetar të KPP, Ismail Shehu është një lidhje e afërt e ish Ministrit të Drejtësisë, Ulsi Manja. Më herët Shehu ka mbajtur postin e Sekretarit të Përgjithshëm të Ministrisë së Drejtësisë.
Kjo situatë pritet të shtojë debatet mbi transparencën e procesit dhe mbi faktin nëse sistemi i pikëzimit garanton realisht një konkurrim të bazuar në meritë, apo nëse përzgjedhja finale ndikohet edhe nga konsiderata të tjera jashtë kritereve profesionale.
