Depozitohet në Kuvend nisma ligjore, zjarret në tokat bujqësore do të cilësohen si vepër penale

Sipërfaqe të tëra me pyje të djegur kanë qenë të zakonshme gjatë sezonit veror. Pamje të tilla tashmë kërkohet të shmangen me çdo mënyrë.

Djegia e kashtës pas të korrave apo ndezja e një zjarri për çfarëdolloj qëllimi në një tokë bujqësore nga fillimi i prillit e deri në fund të nëntorit do të cilësohet si vepër penale. Është ky propozimi ligjor hartuar nga ekspertë mjedisorë dhe depozituar në Kuvend nga deputeti Erion Braçe.

“Një pjesë e mirë e zjarreve në pyje shkaktohen nga zjarret në tokat bujqësore. Në Shqipëri digjen nga 8 deri në 15 ha tokë bujqësorë çdo vit. Kjo është shifër e ndjeshme krahasuar me sipërfaqen për frymë”, thotë Abdulla Diku, bashkë-hartues i projektligjit, ekspert mjedisi.

Në nismën ligjore për të ndalur zjarret e pakontrolluara vlerësohet se flakët dhe tymi kanë ndikim në jetën socio-ekonomike të vendit.

Në relacionin e projektligjit të depozituar në kuvend sqarohet se zjarret në tokat bujqësore do të lejohen vetëm në harkun e muajve dhjetor-mars, gjatë orëve të ditës, me leje nga bashkia dhe Shërbimet e Mbrojtjes Civile, duke garantuar masat parandaluese.

o.j/dita