Deputeti shqiptar në parlamentin e Serbisë, Shaip Kamberi ka bërë me dije se ka marrë kërcënime me jetë. Ai ka publikuar një mesazh në Facebook që e ka marrë nga një person me emrin Danijel Millkoviç në Messenger.
“Mjaft me rrëmbime, ndërsa sa të përket ty personalisht, ruaje gjithmonë shpinën kur të shkosh dikund. Nuk do të kuptosh asnjëherë kur do të vij për kokën tënde“ është mesazhi që ka marrë Kamberi, përmes mesenger, nga personi Danijell Millkoviç.
Në mbështetje të tij, është shprehur kreu i grupit parlamentar të PS, Taulant Balla ka kontaktuar deputetin shqiptar në parlamentin serb, Shaip Kamberi që ka marrë kërcënime për jetë duke i shprehur solidaritetin e plotë. Balla kërkoi që organet serbe të hetojnë çdo përpjekje dhe vepër penale për intimidimin e tij.
“Kam komunikuar pak minuta më parë me deputetin Shaip Kamberi përfaqësues i Luginës së Preshevës në Parlamentin e Serbisë.
I shpreha solidaritetin tonë të plotë ndërsa më informoi mbi kërcënimet kriminale që ai ka marrë gjatë ushtrimit të detyrës së tij dhe i bëj thirrje organeve ligjzbatuese serbe të hetojnë çdo përpjekje dhe vepër penale për intimidimin e përfaqësuesit legjitim të shqiptarëve të Luginës në legjislativin e Serbisë. Këto kërcënime vijnë për shkak të detyrës së tij si deputet”, tha Balla.
m.b./dit
