Takimi i përbashkët i kryenegociatorëve të Kosovës dhe Serbisë, i planifikuar që të zhvillohet me 17 shtator, duket se nuk do të ndodhë për shkak të mospajtimit në përpilimin e agjendës së diskutimeve.
Zëvendëskryeministri i Kosovës, Besnik Bislimi, nëpërmjet rrjeteve sociale konfirmoi gatishmërinë e palës kosovare për mbajtjen e takimit trepalësh të martën që vjen.
Sipas tij, Serbia është ajo e cila ka refuzuar agjendën e ndërmjetësit, duke u përpjekur të imponojë pika të rendit të ditës të destinuara kryesisht për konsum të brendshëm politik.Se kishte keqkuptime rreth agjendës, këtë e kanë konfirmuar disa burime në Bashkimin Evropian.
Por këta zyrtar shpjeguan se të dyja palët janë përgjegjëse për dështimin eventual të mbajtjes së takimit trepalësh. Gjithnjë sipas këtyre burimeve të dyja palët u përpoqën të diktojnë agjendën e takimit trepalëshit dhe nuk u dakorduan me kërkesat e ndërsjella, teksa kanë injoruar propozimin origjinal të palës evropiane.
Megjithatë, mësohet nga burime të mirëinformuara se ndonëse nuk do ketë takim të përbashkët, të dy kryengociatorët kanë konfirmuar shkuarjen në Bruksel më datën 17 shtator.
Kjo nënkupton se së paku se të dytë, Besnik Bislmi dhe Petar Petkoviq, në rast se arrijnë në kryeqendrën evropiane, do të zhvillojnë biseda të ndara me emisarin evropian për dialog, Miroslav Lajçak.
i.b./dita
