Përfaqësuesi i Lartë i BE-së, Josep Borrell ka mirëpritur dakordimin e arritur ditën e djeshme në takimin në kuadër të dialogut në Bruksel, mes kryenegociatorëve të Kosovës dhe Serbisë rreth deklaratës për të zhdukurit gjatë luftës.
Miratimi i saj pritet të bëhet në takimin e ardhshëm ndërmjet liderëve të këtyre dy shteteve, të cilëve Borrell u ka kërkuar zbatimin e të gjitha detyrimeve që dalin nga marrëveshja e Ohrit. Kryenegociatorët Besnik Bislimi dhe Petar Petkovicc u pajtuan në Bruksel për tekstin e deklaratës për të zhdukurit gjatë luftës.
“Marrëveshja që është arritur për tekstin e deklaratës për personat e zhdukur gjatë takimit të djeshëm të kryenegociatorëve është hapi i parë. Ne do ta miratojmë në nivel të liderëve në takimin e radhës të nivelit të lartë të cilën do ta organizojë”, ka thënë Borrell.
Çështja që e ka zvarritur deri tani miratimin e kësaj deklarate ka qenë termi “dhunë” të cilën Kosova ka insistuar ta përfshijë te çështja e të zhdukurve, gjë të cilën e ka refuzuar Serbia.
Por kryetari i Komisionit Qeveritar për të Zhdukurit, Andin Hoti thotë se në takimin e djeshëm është pranuar kërkesa e Kosovës që ai term të përfshihet në deklaratë.
“Nuk do të ketë më vetëm persona të zhdukur, por persona të zhdukur me dhunë nga shteti serb. Gjithashtu, më duhet të theksoj si tepër të rëndësishme, që me anë të kësaj deklarate Serbia detyrohet të marrë përsipër hapjen e arkivave dhe prezantimin e dokumenteve sekrete mbi vendndodhjen e personave të zhdukur me dhunë”, ka thënë Hoti.
m.b./dita
