Diktatura dhe paranoia shpesh ecin krah për krah. Shenjat më të fundit të pasigurisë vijnë nga presidenti i Nikaraguas, Daniel Ortega, i cili gjatë një mitingu të mbajtur të dielën deklaroi se në vend “nuk do të ketë më kurrë zgjedhje”.
Edhe më parë, Nikaragua nuk konsiderohej një demokraci funksionale. Ortega, 80 vjeç, ish-udhëheqës i Frontit Sandinist, i cili në shekullin e kaluar gëzonte mbështetje në një pjesë të opinionit publik perëndimor, është në pushtet pa ndërprerje që nga viti 2007. Zgjedhjet e zhvilluara gjatë kësaj periudhe, përfshirë ato të vitit 2021, janë cilësuar gjerësisht si të manipuluara.
Kundërshtarët e akuzojnë regjimin për burgosjen e rivalëve politikë, shtypjen me dhunë të protestave, arrestimin e intelektualëve dhe klerikëve, si edhe për vendosjen e kontrollit mbi ushtrinë dhe sistemin gjyqësor.
Në vitin 2025, parlamenti i kontrolluar nga Ortega emëroi bashkëshorten e tij, Rosario Murillo, në postin e bashkëpresidentes, duke konsoliduar më tej pushtetin e familjes.
Megjithatë, sipas kundërshtarëve të regjimit, as kontrolli i plotë mbi institucionet nuk i ka larguar shqetësimet e çiftit në pushtet. Ata argumentojnë se presioni i shtuar i Shteteve të Bashkuara ndaj regjimeve të Venezuelës dhe Kubës, dy aleatë historikë të Nikaraguas, ka rritur pasigurinë e Ortega-s.
“Fjalët e së dielës nuk janë shprehje force, por shprehje frike”, deklaroi për The New York Times Félix Maradiaga, kandidat në zgjedhjet presidenciale të vitit 2021, i cili më pas u detyrua të largohej në mërgim nga regjimi.
Nikaragua u bë republikë e pavarur në vitin 1838. Në vitin 1909 vendi u pushtua nga Shtetet e Bashkuara, të cilat në vitin 1937 ia dorëzuan pushtetin Anastasio Somozës dhe familjes së tij. Gjatë kësaj periudhe u forcua lëvizja guerile e udhëhequr nga Augusto César Sandino.
Regjimi i Somozës, i mbështetur nga Uashingtoni, u rrëzua në vitin 1979. Më pas, sandinistët, me orientim marksist dhe të afërt me Kubën, krijuan një juntë qeverisëse ku bënte pjesë edhe Daniel Ortega. Ai fitoi zgjedhjet e vitit 1984, por u mund në vitin 1990 nga kandidatja demokrate Violeta Chamorro, e cila ndërroi jetë muajin e kaluar. Ortega u rikthye në pushtet në vitin 2007 dhe që prej atëherë ka qëndruar në krye të vendit.
Sekretari amerikan i Shtetit, Marco Rubio, u ka bërë thirrje vendeve të komunitetit ndërkombëtar të veprojnë për të parandaluar, sipas tij, eliminimin përfundimtar të zgjedhjeve në Nikaragua.
“Corriere della Sera”
