Nga Adrian Thano
Kryeredaktor
Në 1 nëntor 2012 doli në qarkullim numri i parë i gazetës Dita. Pak vetë e dinë që ishte një projekt afatshkurtër. Por tre muaj pas botimit ishte gazeta më e lexuar në vend. Ndaj mbeti.
Këtë 1 nëntor Dita mbush dekadën. Është një gazetë atipike, e padëshiruar nga sistemi. Shkaqet pse është e tillë janë disa, nuk është sot dita për t’u thelluar këtu.
Dita është gazetë e njerëzve të lirë. Dita është gazetë e njerëzve të mirë. Ajo mëton, si ata, një Shqipëri të re. Një Shqipëri TJETËR. Ku nuk diktojnë dy apo tre grupime të dyshimta.
Kjo nuk është e lehtë. Kjo është arsyeja pse sot kjo media vuan vështirësi të shumta. Si shërbyese, do kishte patur një fat tjetër, të begatë.
Ka një grup shqiptarësh, dhe jo i vogël, të cilët kanë hyrë në pazar me të keqen. Ata mendojnë që duke siguruar një llokmë për vete do kenë imunitet nga e keqja që ka zaptuar Shqipërinë. Por, pazari nuk e zhduk të vërtetën e gjendjes së Shqipërisë.
Cila është e vërteta? E vërteta është se jetojmë në një kohë kur shumica e popullit beson se të jesh i ndershëm është diçka e kotë. A nuk ju duket kjo, e rëndë?
Shpresa për një Shqipëri të re duhet të nisë duke i bërë varrin të kalburës, të sëmurës.
Ne, asaj rruge jemi.
Faleminderit profesor Qoses për këtë letër që na ka dërguar e që mund ta lexoni numrin e sotëm.
Ditë të mbarë, të keni të gjithë, këtë 1 nëntor.
